谷氣！縱使社交平台大遷徙，仍然忍不住睡前撳幾撳Facebook，近日就兩單「洗版嘢」愈睇愈躁，滿滿的網絡判官令我EQ跳總掣，不吐不快！
首先是陳冠希的CLOT將會與Polo Ralph Lauren推出聯名企劃，在多個娛樂平台都被嘲似「壽衣」，Edison一向得罪娛記被寫衰都理解，但所謂的網民又走去笑埋一份，實在是十萬個問號。唐裝結早就經常出現於各類潮流單品，NEIGHBORHOOD、Supreme出又唔見人笑，偏偏因為「陳冠希」3個字，就要被冠上莫須有！
平心而論，CLOT向來不是我口味，但肯定是值得引以驕傲的香港潮牌，2018年先後於NYC、Paris展出系列，2020年Edison與藤原浩、Virgil Abloh平起平坐出席Nike「Future Sport Forum」，而今次聯名Polo Ralph Lauren亦沒有任意加味精，簡單的唐裝結展示東方美學。再者，亦沒有因挨年近晚，硬加甚麼「新年別注」作包裝，更是一大加分位！
雖不能稱得上高質，但肯定不至於被恥笑！
笑啦！仲唔笑？笑啦嘛！又唔見網民笑其他品牌？
另一單是AMBUSH最新配飾系列，簡直完美示範香港人的批判文化，多間網媒出盡奶力引導網民恥笑，連曾與Virgil Abloh聯名的IKEA也帶風向，井底得真可悲！相信恥笑的十居其九都不認識AMBUSH，冇人講咪我講囉，恥笑人者不如先了解AMBUSH創作背景。將五金用品變奏成時裝配飾是主理人之一Yoon Ahn的得意技，甚至受Dior現任創意總監Kim Jones青睞，獲委任成Dior男裝配飾總監，因此絕不是甚麼嘍囉。大家當然有權覺得這批配飾似「膠索帶」，亦有權覺得Overpriced，但下下咁計難怪香港地做創意行業慘過食屎！又唔見會批判成本數百元的CHANEL、LOUIS VUITTON要賣幾萬蚊？真係火都嚟！
好的東西，香港人都不值得擁有？得罪講句！香港人根本思想眼光狹窄過鄰近地區，係喇係喇，得Blackpink、韓劇最好喇，得未！
被香港人炮擊的AMBUSH配飾系列。大家可曾想過「膠索帶」能夠製成耳環，這才是創作的價值，明唔明呀咁大個人！
留意番，全世界IKEA只會得香港區衝出來抽水！
同樣出自AMBUSH設計師手筆，又唔見香港網媒讚下有幾勁？