Jasmine成日話自己係blue blood，因為佢姓羅，係愛新覺羅縮寫，所以佢係清朝王族後裔。我信，佢完全有格格款，而且仲要係「衰衰格格」，仲邊使睇族譜證明？
格格嘅嗜好係cat walk，佢會叫晒啲vendor出席，名義就係有新項目要聽大家意見，其實係佢個人fashion show。佢出場好有氣勢，先等所有vendor到齊坐定，5分鐘後，佢秘書就會推開門話格格到喇。其實未嘅，因為仲有3個manager捧住啲文件逐個行入嚟，到最後先係格格出場。大家會聽到佢對4吋高踭鞋，一步步咯咯聲由遠行到近，然後本尊現真身，格格著住精心配搭嘅couture，華麗出場！
同事次次睇完格格自hi浮誇show，返到公司都會狂呻，因為格格根本就無新項目，來來去去咪係同一個project。話要brainstorm吓如果呢個project要搞衍生項目，有咩可以做？講到好有planning咁，其實成個會重點只得兩個：第一，格格真人示範咩係今期流行；第二，vendor狂讚格格做嘢有「吉屎」，著衫有「波dee」。
Vendor話揾食艱難，點可以輸俾其他人，佢見人哋讚格格，由衫到髮型到首飾，連指甲都讚晒，佢即刻話格格下巴夠V，夠sharp。Vendor解釋佢做人唔講大話嘅，格格最鍾意「岳」高頭同人講嘢，大家多數時間只係見到佢個尖到好似攻擊性武器咁嘅下巴，而尖嘅英文咪就係sharp囉！
除咗下巴之外，原來格格嘅五官攻擊力都好強，包括反白眼、藐嘴同用個鼻發出哼哼聲。佢一出招，死傷無數。為咗避免無謂犧牲，個個vendor咪擦晒鞋囉。格格成日想搵我哋幫佢做嘢，我次次都話公司太多嘢做，冇人手。格格竟然打俾老細，投訴我唔接佢哋啲生意。我同老細話：「我唔想同格格玩cosplay，扮晒女僕侍候佢，老細，不如你抵諗啲，由你上！」。