下午三點，我還在辦公室內玩facebook。Emma端了一盒很精美的西餅進來：「老細，下午茶食蛋糕呀。」我望了望個餅盒：「嘩，貴嘢嚟㗎喎！」隨手拿了一件士多啤梨味，大口大口地吃著。
「仲未走？個個都收晒工啦喎。」老細向女同事搭訕，來來去去都是這些開場白。
「係呀，諗住趕埋啲嘢吖嘛。」行貨到不得了的答案。
我望了望女同事的桌子，整潔非常，幾乎一點雜物都沒有。我心想，她大概是那種每天返工都會清理好所有手上工作，絕不肯留條尾巴到明天的那種人。
「同事，唔好意思，其實應該點稱呼你……」
「我叫Audrey」同事向我報以一個微笑：「你應該唔識我㗎啦。你係傳聞中失蹤咗兩年嘅嗰位老闆CK嘛。Kathy姐請我返嚟嗰陣，你應該剛剛唔見咗人。」
「哈哈，我放假啫……唔好講到失蹤咁嚴重……」我說：「啲嘢唔趕嘅就聽日先返嚟做啦，早啲放工返屋企啦。」
「老細，你知唔知下晝啲西餅其實係我請㗎？」Audrey淡淡地說。
「哦？係呀。」我還是反應遲鈍：「好好味喎。」
「散水餅嚟㗎。」Audrey眼睛還是盯着電腦螢光幕：「我今日last day啦，再唔做埋佢，以後都唔使做啦。」
我呆了呆，大概真是沒上班太久，連反應也變得遲鈍了。無啦啦三點三有免費西餅食，居然都唔醒水在發生甚麼事，我也真夠死蠢。
我沒打算開口問Audrey為甚麼離職，不過一個同事在返工最後一天，還在OT幫你完成工作，斷估都應該係個有責任感的好伙計啦啩。換轉是我，恐怕老早就hea住等收工了。好同事難求，我心諗：「點解我哋又留唔住呢啲好人㗎……」
「OK，搞掂晒！」Audrey隨即關上電腦：「老細，你反正喺度，咁我啲staff card同鎖匙就交俾你啦。麻煩你聽日幫我交番俾HR。我走啦，拜拜！」
沒想到我回來還不到兩個星期，就已經有同事離開了。派罷散水餅，last day還在幫你努力完成最後工作的同事，我以前也遇過好幾個。這些同事，在職時往往覺得平平無奇，直至離開的一刻，才覺得若有所失。