返內地拍科幻片古仔否認做金像獎司儀

古天樂(古仔)與杜如風昨日出席宣傳活動。活動上，古仔更擔任「賽篋」評述員，十分生鬼，但他否認是為今年金像獎主持做熱身。

最近有傳古仔今年會做金像獎主持，他直言：「好多傳聞都話我今年會做，但我唔會啦，應該冇時間，頒獎當日我仲喺內地拍戲。呢件事都係朋友話我知，我從來冇收過任何邀請，今年金像獎亦都去唔到。」忙於拍攝科幻片的他又透露，「目前只開機兩星期，之後仲有三、四個月會喺內地趕拍，所以最近都比較忙，電影入面好多特效部分都比較複雜。」

唔敢返無綫救收視
有指無綫將開拍《再創世紀》，古仔坦言：「有聽聞過，但無綫冇搵我。」談到羅嘉良及張衛健等也回巢救亡，他表示難以擔起救收視的重任，「回巢拍劇主要睇劇本同時間，可能要好多年後先得。」另外，提到他在今次廣告由替身使出「一字馬」，他表示非常喜歡這個概念，自己亦覺得很搞笑。