愚人節談「愚人」關節炎

四月一日，在公立007醫院的骨科病房內，凌醫生和李醫生正在巡房，竟發現昨晚由急症室送上來的病人，全都因膝關節炎而入院。與此同時，病房內的電視正在重播一套90年代的港產電影。

李：「第一位病人：78歲男士，右膝急性發炎同埋腫脹，痛到行唔到。琴晚我on call，已抽咗積水，等緊化驗報告。臨床診斷係痛風，開咗口服消炎藥。」

凌：「痛風只係佢表面嘅掩飾！雖然病人係男士，之前又有疑似痛風紀錄，連急症室醫生都寫低話佢係痛風發作。但係你有冇留意佢張X光片？佢嘅膝關節軟骨鋪咗一層鈣化，實際上，佢係假性痛風！」(此時，電視剛好傳來一句對白：「表面上係一個大哥大電話，但你睇到呢度有一層金屬網膜。實際上，佢係一個鬚刨嚟！」)

李：「假性痛風(CPPD) ，同平時尿酸超標引起嘅痛風唔同，主要係因為『焦磷酸鈣晶體(CPP)』喺關節軟骨積聚。呢種病通常喺長者身上發病，同代謝異常有好大關係，例如有副甲狀腺功能過高，搞到高血鈣，又或者係血鐵沈積症，同埋身體唔夠鎂。仲有好多時，當病人做完關節手術後，或者因為肺炎、中風而入院，都有機會引發假性痛風發作。呢啲創傷同埋病患，所帶嚟嘅生理壓力，會令黐喺軟骨上嘅結晶，甩咗落關節腔入面，結果引發急性關節炎。」

凌：「等埋積水嘅結晶化驗報告，我哋就分別到佢究竟係真定係假嘅痛風。」

李：「第二位病人：85歲女士，左膝關節O形畸形、發炎同埋積水，臨床診斷係退化性膝關節炎加上急性炎症。出院後我會安排佢覆診，輪候換骹手術。」

凌：「表面上佢係有膝關節退化，膝頭哥已經變哂形，X光片又睇到關節空間收窄，同埋骨刺增生，但係單純嘅退化，好少會出現咁嚴重嘅急性關節炎。你睇吓！同上一位病人一樣，佢都係有軟骨鈣化嘅跡象，只不過俾啲骨刺遮蓋咗。實際上，佢都係假性痛風！」

正當電視傳來一句「使唔使咁多風筒呀？」的對白時，李醫生心裏也想：「使唔使咁多假性痛風呀？」，但他卻正經地回答上司淩醫生：「我已經抽咗積水去化驗，雖然都係靠消炎藥嚟治療，但要去區分兩者，就要睇吓積水嘅白血球指數高唔高，同埋顯微鏡下見唔見到有CPP晶體。」

凌：「無錯！雖然治療急性關節炎嘅方法大同小異，但痛風患者平日要戒口，假性痛風就要驗血排除同埋糾正代謝問題。至於退化性膝關節炎，就可以靠換骹去根治。」

李：「第三位病人：56歲女士，本身有糖尿病，右邊膝頭急症發炎同埋發高燒，抽血發現白血球過高，懷疑係膝關節細菌感染。琴晚我已經抽咗積水，等緊革蘭氏染色抹片(Gram Smear)結果，隨時安排佢做緊急關節鏡手術去沖洗關節。凌醫生⋯⋯今次你唔會再話佢係假性痛風啦啩？」

凌：「表面上佢係細菌感染，實際上⋯⋯因為糖尿病令免疫力降低，所以佢都好大機會係細菌感染！小李你講得啱，關節感染細菌，冇飛快地去開刀放膿嘅話，關節軟骨就會急速受到破壞！」(此時，電視又再傳來一句對白：「『飛』係小李飛刀嘅飛，『刀』係小李飛刀嘅刀！」)