鏡粉的矛盾

早前有傳姜濤銳意打入國際市場，將會轉會去Sony Music。一班鏡仔先後幫佢回應過一輪之後，本尊終於現身，承認自己係轉會，不過係由籃球轉去打pickleball。至於傳佢去Sony，姜濤就話自己都係睇新聞先知，對於會同公司續約定係轉會去第二度發展，佢就話未諗到咁遠，依家只係專心做音樂。算係四両撥千斤地否認咗傳聞，不過相信傳聞唔會因此而消失，仲會隨着完約嘅日子愈近而愈多。

事實上，自從姜濤自爆仲有三年完約之後，轉會傳聞同粉絲之間嘅討論可以話係未停過。最近我喺網上發現咗個小型民調，問鏡粉覺得MIRROR十二子合約完咗之後應該點走，結果都幾出乎意料，想同大家分享下。

最多人支持佢哋做獨立歌手，覺得可以自己揀音樂風格、合作對象，唔使受公司框架限制。粉絲心目中，呢種自由好浪漫，覺得偶像可以展現最真實嘅自己，發揮更多。而MIRROR每個人都有唔同特色，粉絲覺得如果各自發展，可能會令香港樂壇更豐富，甚至有機會走出國際。

我覺得出乎意料嘅原因，係因為第二高票數，就係同MakerVille續約。雖然公司過去不斷被批評，鏡仔任何嘅問題都係公司嘅錯，而偶像成立公司，自己話事當然好似幾好，但有粉絲亦深明現實唔係咁簡單，獨立歌手要自己搞宣傳、製作、演唱會，全部都要錢，仲有面對好多法律問題，例如版權、合約、商標，冇專業團隊真係好難處理。粉絲又睇到，其他公司良莠不齊，留喺原公司最多都係好似而家咁偶有甩轆，但穩定性高，唔會因為資源不足而停滯；有平台、有資源，偶像先可以專心唱歌跳舞，唔使煩行政同財務。

粉絲心態好矛盾，雖然想偶像自由，但都擔心佢哋未必有能力應付咁多麻煩事。香港市場細，資源集中，獨立歌手要突圍真係唔容易。如果搞唔好，可能仲會拖慢事業。正如打工仔都會明白，九成九人都唔滿意而家份工，但會跳槽嘅人又唔係咁多。講到尾都唔係為鬥氣，而係點先保持到人氣。