一年一度嘅「姜濤誕」剛過，過去一年姜濤有唔少新聞，被質疑「已經唔紅」。
加上今年正日生日去咗新加報做巡唱，原本有人懷疑「姜濤灣」今年會唔會冇往年咁熱鬧，結果呢？成千上萬姜糖延續傳統，由朝到晚慶祝，黃雨都唔走繼續大合唱，究竟是甚麼令大家風雨不改？我從核心內外圍分析下。
先講核心外圍，即係我呢種非姜糖嘅市民。正面嘅人即使本身對姜濤冇咩感覺，但都會好奇去「姜濤灣」感受下氣氛，欣賞「姜濤誕」嘉年華咁，製造「期間限定」景點，熱熱鬧鬧留港消費，振興市道經濟，又有免費電車搭，對成個社會都係好。
負面嘅人就會覺得班姜糖唔知為咩、又阻街，甚至質疑班姜糖係假，一切只係用錢做出嚟嘅宣傳手法。其實唔怪得佢哋，世上願意無條件付出嘅人係唔多，而家仲要集中力量，自發做成一件咁大規模嘅活動，有咁多人響應，又冇咩實質回報，確係唔多人可以理解到嘅，不過解釋都好難會說服到呢班人，只能說這種愛是他們不懂的。
至於核心內圍，當然係姜糖同姜濤啦。姜糖連續幾年喺銅鑼灣買戶外廣告，製造打卡點、紀念品、派傳單，仲包電車全日俾全港市民免費乘搭，都係為慶祝偶像生日，同時向其他人介紹偶像，展現姜糖係好有秩序同善良嘅。做咗幾年，雖然仍會引來上文所述嘅核心外圍負面者質疑，不過我覺得，呢啲反而係偶像要聽嘅。
幾紅都好，都應該時刻提自己：「我邊值得咁勁？我要繼續謙虛繼續努力，令到自己更加值得。」我相信姜濤正正因為有呢個思維，先有咁多人鍾意。偶像都係人，一味只有讚美同維護，性格好易扭曲，適當地有負面嘅聲音先平衡到。所以，做偶像嘅要成日檢討自己，做粉絲嘅，表達支持之餘，亦唔好做咗扭曲偶像嘅幫兇，即係做得好嘅時候讚下，但唔使捧到上天；做得唔好嘅時候就提下，唔好幫佢搵藉口，賴天賴地賴周圍嘅人幫佢開脫，咁呢種愛先至係恆久不枯。
