方太視電視台頒獎禮為年度大事，一早問我當晚有無英超直播，潛台詞是叫我咪返屋企爭電視睇。事有湊巧，利物浦踢星期一深夜，車路士、曼聯、阿仙奴、曼城踢星期六，踢星期日的，得熱刺，都要十二點先開波，頒獎禮舉行期間居然無英超賽事進行。上帝都要我陪阿媽睇視帝視后。
很多朋友，一路睇一路鬧。我沒有感覺。一間公司，搞個春茗或員工大旅行之類的東西，途中頒發獎項鼓勵員工，當然係老闆喜歡邊個就邊個有獎啦。我又不是打無綫工，個獎項又不是似金像獎代表香港，關我甚麼事？見到相識一場的朋友如唐詩詠得償所願，會替她高興；見到一個獎項分五個得獎者，也沒有憤怒或難過。Come on，你在公司聖誕派對見到全個部門有一半以上的同事各自抽到港幣五十元作為禮物，也不會發火話公司分豬肉啩，對不對？何況，一眾美女無視限奶令，個個低胸低到落肚臍，又露出長腿，仲想點啫？
都唔係無娛樂性吖！睇到陸永光明正大當面寸阿叻，我跟金星妹都睇得相當開心。看到被楊怡稱為哈利波特，我覺得更似德古拉伯爵的馬國明，臨領獎時也要眾裡尋她地找女朋友黃心穎握一握手，都幾sweet吖！戲肉還在接近壓軸登場的阿姐，一分鐘前代表全台員工，向老闆要求加人工減工時，惹來台上台下一致歡呼；一分鐘後，望住一眾高層警告唔好再搞山頭主義，歡呼聲即時冰封，大家在思索應該擺出甚麼反應才無事，還不是真真正正演技大賽？阿姐即係阿姐，服！
配合年紀配合地位配合身份，一個人應該做回適合自己的工作，看阿姐輕輕鬆鬆走出來發表謝辭，記熟台詞，一矢中的，不加廢話，一方面說盡公司的風光，同一時間作出有實際作用的批評。一般人不敢說或不會說，一般人就算說了也沒人理會，就只有阿姐可以說也應該說而確實說，一間公司還保留到這樣的員工，命不該絕。讓我欷歔的，是緊隨其後的許冠文，都2018年了，還要一大堆演員在身後企定定接近五分鐘，聽這位頒獎嘉賓講述自己如何入行如何威風如何好笑。在《雙星報喜》的時候，五分鐘可能只需炮製一個笑話；今日，五分鐘可能等於一整個節目。如果不了解這項殘酷的事實，就很麻煩。最後，以金星妹的一句說話作總結：「換了我是老闆，都頒大獎俾王浩信啦！一上台就大讚公司五十年來對社會貢獻良多，仲居然可以客觀抽離到由完全唔關事的《閃電傳真機》講起，連譚玉瑛姐姐都多謝埋，拎完個獎直頭似要報答養育之恩咁，抵呀！你睇吓馬國明？長期擺出一副不在乎姿態，觀眾就鍾意，老闆就唔會like啦！」嗯，收到了，我以後會向老闆擺出一個好恨攞獎的表情了。