九十年代有一部相當精彩的愛情災難片《鐵達尼號》，一個未算傾國傾城的阿Rose，與一個靚仔到無倫的阿Jack，就此展開一段蕩氣迴腸的愛情故事。二人由相遇到相愛到攜手歷經生死再陰陽永隔，也不過四天。很多現實的觀眾看完說：「唓，四日咪愛到癲囉！對多一年就散㗎喇！」
是的，有部港產片《我左眼見到鬼》，女主角與她死鬼老公也只愛了七天就陰陽相隔。大家都很會算術，所以我們慣性用時間衡量一段關係可以有幾愛，好過講愛情咁虛幻。但其實誰說一定要像楊過小龍女般相隔十六年才算刻骨銘心？幾日，就不能愛得死去活來嗎？
我沒有意圖或企圖去否定如果當年阿Jack與阿Rose繼續拍拖就無好結果。只係命運係要俾佢哋愛四日 -> 永隔，我知「如果阿Jack仲在生」兩人會散，但依家真係冇經歷轉淡期吖，為甚麼我們總愛「睇死」一段關係？「嗱，我都話㗎啦！」就覺得好成功。
叻喇，睇死咗喇，咁又點？
在激情中硬CUT，必然刻骨，那就承認它是刻骨的吧！對，被硬CUT也是一種幸福，就讓你一世只記住最璀璨。原來這樣也會招人妒忌，因為少有、因為愛得超轟烈，於是個個搶住做先知。「咁愛，冇意思㗎，之後都係冇。」但人哋依家真係冇「之後」，整定的，唔恨得咁多。