實不相瞞，
我曾經喜歡過陶大宇先生。
那是1992年，《大時代》首播。大家的焦點放在鄭少秋或劉青雲或藍潔瑛甚至周慧敏、郭藹明、劉松仁身上。我竟然最欣賞飾演丁益蟹的陶大宇。因為，入型入格，做一個又臭寸又怕死又賤格的大壞蛋，強姦方敏即係楊羚，仲傳染埋性病，仲要唱通街，是四兄弟之中，最乞人憎的一個。陶大宇演來入木三分，到結局，四兄弟輪流被老竇掟落樓慘死，大快人心。我見到陶大宇慢動作在劉青雲的窗前下墮，個心特別快。
自此，陶大宇行運。《壹號皇庭》系列捧紅了陶大宇與歐陽震華兩位其貌不揚的小生。歐陽震華之後主打喜劇，合理；陶大宇居然在《刑事偵緝檔案》系列做神探做情聖做靚仔？又真係大受歡迎，還得到一個師奶殺手的稱號，一洗幾年前接拍《哎吔女朋友》、《男與女》等三級片的污名。《刑事偵緝檔案》所謂峰迴路轉的案情，其實全部夾硬嚟，咁都紅，除了行運，也不知怎樣解釋。行運行到跟初出道一臉baby fat可愛非常的郭可盈打情罵俏足足兩三年，人人話登對？好彩，當時，我個情敵個樣，跟陶大宇撞了九成，我仲係鬥輸嗰個，不用等到陶大宇多年後接拍《心花放》，不斷掩臉傻笑變成emoji圖案，我才反感。
事實上，陶大宇的高潮，來得快去得快。九十年代末，離開大台拍了幾齣亞視劇集如《縱橫四海》如《影城大亨》後，回巢大台，地位已經大不如前。尤其拍《學警出更》，背妻搞上郭羨妮，形象插水，在香港更難搵食。不過，據說陶大宇單憑《刑事偵輯檔案》張大勇一角，在大陸不愁登台機會，待遇還理想到難以理解。你叫他留在香港繼續拍劇試試再創高峰？他應該不會太情願。堂堂不知幾多屆視帝羅嘉良，在大陸也是給富婆抽抽水，直播帶貨，拍拍抖音，陶大宇靠唱歌賺錢，算很有尊嚴。
機會留給有準備的人。一曲《倒轉地球》，震撼全港。個人經驗，聽過一次，簡直無法忘懷，盤旋腦海揮之不去，完全騎劫了劉德華的原裝正版。上一次做到類似效果的，可能是英國歌后Adele翻唱Bob Dylan的《Make You Feel My Love》。雖然知道香港市場無法跟國內豪客相提並論，不過，飲水思源，如果陶大宇肯回流，慰藉一下香港樂迷，實在是我們的福氣。
尤其建議陶大宇參加《全民造星IV》，選女團。一來，陶大宇今年五十八歲，有一定年紀，還追夢的話，夠熱愛，充滿正能量，符合評審口味。二來，有個人風格，試問地球上還有沒有另一人似陶大宇歌藝出眾？都未計與別不同的台風與炒熱氣氛的能力。或者，你會認為：喂，陶大宇唔夠靚喎，無乜觀眾緣喎。這些，不重要，靚仔唔靚仔靚女唔靚女，笑得甜美不甜美，身材好看不好看，是觀眾的事。觀眾的事不等於評審的事，更加不代表是節目或電視台需要關注的事。
最後，你當然會話：喂，陶大宇係男人喎，點選女團呀？今時今日，還將性別簡單二分？隨時被道德家們插到死呀！陶大宇堅持去面試，被拒諸門外？告返你性別歧視都仲得。所以，無問題的，真係可以去馬的，只需要記得：噓～噓～噓～