文偉鴻監製的《隱形戰隊》確實值得一睇，雖然劇集仍然有些少無綫(TVB)作品難以洗甩的膠味(例如第一集的喪屍妝有點差劣，第五集唐詩詠、劉穎鏇中計有點兒戲)，但劇情毫不拖泥帶水，節奏亦總算明快，而且還有大量槍戰、飛車和埋身肉搏等充滿官能刺激的畫面，好像出爐視帝陳山聰第五集光速搶槍解圍反殺「活人狩獵黨」的一幕，相信不少觀眾都睇到忍不住「嘩」出聲。
文偉鴻好有可能是現役大台劇集監製中最識集合爆紅元素的一位，《使徒行者》(2014)、《城寨英雄》(2016)、《同盟》(2017)、《鐵拳英雄》(2022)和《超能使者》(2022)都是由他擔任監製，用大量動作場面，再加少少臥底故事，來谷大收視。不過，他的作品似乎愈來愈走不出套路，特別是「估Big Boss」格局，開頭在《使徒行者》、《城寨英雄》時都會覺得新鮮，但體驗多幾次就自自然然覺得「冇癮」。或者他終於醒覺，知道自己需要突破，所以今次《隱形戰隊》未正式開拍已經講到明「收視福將」陳展鵬今次會客串演全劇最大反派(相信搵得這個卡士演，應該沒有幕後大佬吧，除非他原來又是臥底)，嘗試用另一種進路去吸引觀眾睇到最尾。
當然，放棄一貫套路好可能會失手，所以文偉鴻在今次《隱形戰隊》明顯添加了不少「鹽花」，令劇集明顯比起前作「少少鹹多多趣」，首集一開波就有劉穎鏇着貼身背心「彈彈下」捉犯，第二集又有惹人遐想的劉佩玥「羅拉Look」跨騎馬國明畫面，到第五集更有劉穎鏇噴血三點式，不但搞到曾經公開承認睇AV的馬國明，宣傳劇集時亦不禁大爆有舊同學因此搵他讚劇集「波濤洶湧」，亦吸引傳媒連日報道，而大台官方YouTube頻道的劇集精華片亦擺明車馬Sell「鹽花」，以「誘惑擔當VS最強Body」來形容劉氏二姝，相信吸引了不少觀眾收看相關片段以至劇集本身。
由此證明大台節目不止只對較為年長的觀眾具吸引力，只要「鹽份」到了一定程度，在「鹹濕仔/佬」界別中還是繼續有一定市場，最近除了《隱形戰隊》之外，剛剛播完的旅遊飲食節目《吃貨橫掃曼谷》亦反映到這件事，主持彭慧中和陳星妤在節目中頻頻性感亮相，無論收視還是迴響都比起之前同樣時間播放、梁芷珮主持的《非洲潮什麼》更加犀利，又好似最近被發現女主持連環走光的《流行都市》，長期有一班捧場客心懷不軌等「彩蛋」出現。相信大台再嘗這種收視甜頭後，會繼續開拓「黃色電視圈」這條路線，到時應該會不斷見到女星在「公仔箱」大派福利，但這種玩法好有可能觸動到明光社等「衛道之士」的神經，要好好拿捏先得！