「早買早享受，遲買平幾嚿」定律，唔一定適用喺遊戲界，只要係僧多粥少，定價就好難保持，除非大家已經轉晒用eShop玩下載版本，咁就統一定價；但冇減價嘅下載版，因為要跟官方定價，往往都會比實體版貴啦。無啦啦講起，係因為上期稿未正式講到，但都提過嘅《Bravely Default II》，算係近期喺唔多熱鬧嘅市場入面成為焦點牌，由本來定價三百中一度炒上四百中，但第一批貨都仍然賣斷，去到幾日後嘅第二批貨，定價已經貴咗幾十蚊，結果當然就係「遲買貴幾十」啦！有咁嘅情況，最大原因就係商家們睇低遊戲吸引性。問心嗰句，好多朋友買咗Switch，來來去去都係玩《動森》、《Ringfit》，對上一隻真係沉迷嘅可能已經去到《薩爾達》。從來Switch都係要食時令，冇主流話題嘅遊戲，大家又點會夠膽返大貨呢？而《Bravely Default II》就係一隻小眾機迷會識欣賞嘅好作品，雖然主流未必大力介紹，不過game界知名，自然都要分享俾讀者啦，趁返咗貨，不妨支持啦！