廢話唔多講，上星期任天堂直播會Nintendo Direct，公布咗多隻Switch新作，當中要數呢隻《Project TRIANGLE STRATEGY》最值得分享，皆因佢已經同步有得下載Demo版本，仲要係全中文！齋睇遊戲畫面係咪有啲熟口熟面？冇錯，皆因同樣出自SQUARE ENIX製作人淺野智也，即將喺2月26日推出嘅《勇氣默示錄2》(Bravely Default II)及JRPG名作《八方旅人》(Octopath Traveler)，就係由淺野團隊開發。
《Project TRIANGLE STRATEGY》依舊係用極具風格嘅點陣圖進化型「HD-2D」製作，復古結合3DCG畫面效果正正係魅力所在。今次遊戲亦非RPG，改為八、九十年代主流嘅SLG，簡直令土下座呢啲老鬼睇見眼濕濕。Demo版唔算長，但已可試到主要系統及遊戲流程。作者雖然屬戰棋玩法，但戰鬥中間會有RPG部分，俾你發掘劇情及隱藏元素。部分對白更可按玩家嘅答案選擇，分類成三種唔同「信念」，影響到劇情分歧及加入我方陣營嘅角色。而戰略部分，亦與時並進地將敵人嘅移動距離同步顯示埋俾你睇，毋須好似以前咁要「數格仔」行軍，仲未講完嘅仲有職業、技能、魔法等系統，淨係玩完Demo都幾乎可以肯定係SLG神作，可惜要等到2022年先發售，而家有得試玩就玩住先啦！