復活節假期無出埠玩，留喺香港都有唔少活動嘅，好似香港賽馬會嘅年度大型社區活動「同心同步同樂日」，就喺呢段期間舉行，在沙田馬場及彭福公園舉辦超過70項寓教育於娛樂嘅活動，如果大家有去到，仲隨時有機會與星級名人見面，今次佢哋就請嚟叱咤球壇多年嘅「神奇隊長」、曼聯名宿白賴仁笠臣(Bryan Robson)同埋冠軍拳手「神奇小子」曹星如，結果成就咗呢次「神奇」碰面。
 

二人喺不同年代、不同領域稱霸體壇，一見面就惺惺相惜，交換紀念品期間，笠臣給曹星如送上親筆簽名球衣，曹星如就以親筆簽名拳套回禮，笠臣仲隨即戴上拳套，但就無作狀打拳，然後笑笑口話，假如要跟曹星如對打就唔好嘞！

今次笠臣遠道而來，參與慶祝創下「最多人同時為雕像塗色」嘅健力士世界紀錄。至於曹星如，作為馬會「千里路 踏前步」社區勵志計劃的星級師友，佢就同大家分享面對困難永不放棄的經歷，如何積極面對傷患，以及保持健康飲食小貼士，同場亦抽出20名幸運參加者，玩問答遊戲考考健康飲食知識之餘，仲齊齊做體能運動㖭。