真正嘅日本味道

創作懷石料理每位$500
Facebook：Kurosawa Kitchen (Japanese Food Catering Service)

每次去完日本，都特別掛住當地嘅料理。雖然話香港有唔少高質素嘅日本餐廳，不過正宗嘅家庭料理就比較少見。由日本人黑澤夫婦主理嘅私房菜Kurosawa Kitchen位於元朗，地點唔算就腳，建議自己揸車入去，因為食完飯就算call的士，都未必架架肯入嚟，比較唔方便。之但係由黑澤先生創作嘅懷石晚餐，就絕對值得你山長水遠貢入元朗！

由於每晚只招待一枱客人，所以兩個人已經可以「包場」！室內設計簡約而寬敞，每道菜都由精緻嘅和式餐具盛載，雖然黑澤太太係香港人，但二人以日語溝通，搞到我都差啲以為自己喺日本。

上個月試咗秋日懷石料理，前菜已經令我超級驚喜！有廣島蠔酢物、和風冷製鮑魚仔同溫泉玉子烏冬三款。先講酢物，飽滿嘅蠔肉鮮甜帶微酸，夠晒開胃；而鮑魚仔浸足一晚，非常入味，而且口感彈牙，一啲都唔韌；滑溜嘅溫泉玉子烏冬更係我杯茶，好味到忍唔住食埋友人嗰份！之後嘅鰹魚高湯煮野菜、刺身、天婦羅、燒汁澳洲和牛、茶漬飯同果物，全部都係心機嘢，凸顯黑澤先生嘅功架。加上分量十足，唔會將貨就價，完全體現日本人對客人同食物嘅尊重。

黑澤先生，ありがとうございます！