Let's make some babies, baby

我有幾個內地的好朋友，我哋一幫人經常都好鍾意搞小圈子飯局，飲飲酒、吹吹水。好多時食完飯大家就會移玉步至餐檯旁邊的嗰嚿好粗獷嘅木頭前面飲飲茶，借酒意講講深情嘢。

其中有兩個係公務員，喺內地能夠做到公務員係值得開番支香檳、劏番隻狗慶祝的喜事，所以都係人上人。但係人上人裏面仲有分人上人上人、人上人上人上人同人上人上人上人等的分別。分別叫李坎坷同陳大官的兩位朋友就代表咗兩種不同版本的當官故事。李坎坷同陳大官係大學同學，20年前一齊考到公務員之後就劏晒狗咁慶祝，直到今日都仍然會個個星期搵番日聚聚首，兄弟飯局一下。今次飲飽食醉後，坐喺旁邊飲茶吹深情水的時候，李坎坷嘆咗聲大氣後講：「我又係博士，專業文憑又多過你，日日陪老細，又要做牛做馬，最食屎嗰啲嘢我全部做晒。你就坐火箭咁猛升級，我就仲係咁嘅狠樣。」

陳大官帶住個招牌嘅笑容，同李坎坷斟咗下茶，從容咁話：「幫領導做一百樣好事，不如跟領導做一件壞事。」

一針見血。

首先點解讀個「壞」字，唔好諗得太壞、或者太邪。

其實呢種精神唔係大陸獨有，美國大學那些Fraternity, Sorority 等的兄弟姊妹會，就係圍威喂一齊做壞事嘅組織。一齊劈酒、隊草、溝女、抄功課咪兄弟咯。前美國總統小布殊都係fraternity成員，最後都做咗總統，所以無話做壞事就一定會失敗嘅。但係領導之間一齊做嘅壞事有D乜，我就唔知喇，鬼叫我唔係當官咩。可能一齊呃老婆話喺度加緊班，但係其實偷偷地一齊去飲珍珠奶茶掛。鍾意點演繹「做壞事」，請讀者隨意發揮。

但係能夠同領導一齊做壞事，係一門藝術。唔係話領略咗以上嘅秘笈，就可以成仙。武功，係要練的，有啲日子，方能發功。你試下一嚟就同領導講，「喂，一齊做壞事好無啫？」，睇有乜後果。

等同於你同個新識嘅女神一嚟就講：「Let's make some babies, baby?」

後果係，你同佢make 唔到 baby, 很可能跟住你個朵就臭晒，跟住仲搞到自己同其他人都make唔到baby。

一樣，你同領導一嚟料就想make baby的話，會導致你同其他領導都make 唔到 baby。

香港人好鍾意粗暴咁將朋友分成兩類：一種講錢嘅、一種講感情嘅。

講錢嘅係工作上嘅朋友，話走就走，離職前買幾件西餅都覺得肉赤的。講感情的就係工作以外認識的朋友，比如說舊同學，Family friend 嗰啲。

總之，講錢嘅朋友就唔好講感情；講感情嘅朋友就唔好講錢。

然而，太過執著呢種精神的人，就好難同領導make baby。因為領導係你工作上的朋友，但係你必需將佢劃入感情朋友嘅category，二合為一，先 make 到 baby。

下一步，就係評估下你同領導之間嘅關係究竟係咪真係好熟。你有無同佢飲過酒？佢有無帶過家人同你見面？有無同佢一齊去過旅行？有無佢的秘密嘅私人電話號碼？（因為一般人都公一個電話號碼，私一個電話號碼）如果以上龍珠集齊晒，你就可以考慮同領導make baby了。否則，慢慢集齊晒啲龍珠先再講啦。