老細話我串，喺餐廳見到個舊客「千頌伊」都唔同人打招呼。吓，嗰個係「千頌伊」咩？老細即刻話，無理由連佢嘅標誌性柔順長髮都唔認得啩？唔怪得咁熟啦，原來係把長頭髮！個樣，真係對唔住，我無辦法認到。因為我serve咗「千頌伊」5年，我淨係記得佢副黑超、口罩同樽領衫。 第一次開會，係見過佢成塊面，之後就要逐部分逐部分睇，好似疑犯拼圖咁。
我記得第二次開會， 「千頌伊」就戴住個韓式黑超出現，佢話染咗紅眼症，唔想傳染俾其他人。 佢嘅紅眼症復原得比其他人慢，要成半年。好番之後，對眼大咗好多。佢對眼好番，又話有鼻竇炎，要成日戴住口罩， 又係病幾個月，醫番個鼻竇，原來個鼻都會高埋。「千頌伊」係唔好彩，好多病，跟住佢又扁桃腺發炎，唔知點解都要戴口罩。
又係病幾個月，醫番好扁桃腺，個下巴都V埋，跟住話氣管有事，大熱天時都著樽領衫。醫番好氣管，個胸都大埋。由於佢成日要飛韓國覆診，我懷疑佢一定搵到大長今咁嘅個韓國神醫，又或者佢咁多病，會唔會早就死咗，而家係借屍還魂，所以個樣同body都簡直係另一個人呢？
後來我發現「千頌伊」嘅部位式長期病係會傳染㗎， 佢啲女同事一個一個開始戴黑超，然後戴口罩，跟住著樽領衫。好彩佢哋都搵到神醫醫番好佢哋，令佢哋脫胎換骨，重獲新生！我哋有幾個serve佢哋嘅同事，對得佢哋多，都有啲作病，呢排成日話對眼唔係幾妥。連茶水部玲姐，斟咗一次茶俾班客，就即刻得咗急症，話出疹，𢯎到兩條眉骨紅晒，好彩佢又搵到神醫，之後原本無兩條眉毛嘅佢，突然出咗啡色眼眉。
我問老細，公司係咪應該與時並進，考慮下醫療保險加埋去搵神醫，睇世紀傳染病呢？老細話精神科係cover嘅，叫我去睇下。