「土地大辯論」帶出有關填海爭議，團結香港基金早前提議在東大嶼建大規模人工島，建造面積相當於半個九龍的2,200公頃，長遠紓緩土地不足問題，言猶在耳，基金會竟邀請到有「民間特首」之稱嘅劉德華開腔，為基金會製作的宣傳片義務擔任旁白，力撐東大嶼人工島方案，氣勢與別不同。
呢套名為《讓下一代看見》的影片長約3分半鐘，先回顧香港過去成功經驗及美好回憶︰「八、九十年代的香港，好有衝勁，地方細細，志氣遠大，好像甚麼都有可能發生……」然後回到當前香港社會困境，包括上不到車、租不起樓、上班擠迫、放假更擠迫……」指出問題根源都離不開土地房屋短缺。劉德華其後又提到各個中短期方案雖然可以解燃眉之急，但要長遠紓緩住屋問題，佢「覺得東大嶼嘅大規模人工島方案睇嚟係比較可取。」由於旁白係以第一身讀出，亦即反映劉德華個人取態，佢仲話「一講到填海，就肯定有好多唔同意見，但呢個世界沒真係有一個百分百完美的方案咩？想香港繼續向前行，取捨係在所難免。選擇一個對香港未來最有利嘅方向，去行啦！」語氣非常肉緊。
今次由劉德華出口力撐，填海方案似乎可看高一線。影片已上載至基金會網頁，睇片可點擊連結：https://goo.gl/8pr415 ，am730 facebook 專頁亦一樣有得睇 http://bit.ly/2yg5i1q