星期二早上，我在九龍某老牌大型屋苑的大家樂吃早餐。熟知該時段沒有靚女出現之故，我挑了一個幾近「面壁」的位置坐下。可惜忘了帶耳筒，我沒有如平常般聽著歌。算了，就算做不到「完全自閉」，也無損我右手拿多士，左手「碌」FB，忘我地將注意力集中在面前的5吋螢幕上。正當我八卦著靚女行家Janice周末在日本的賞櫻之旅，旁邊三位阿婆的高談闊論卻似乎比櫻花更吸引……
「嗰隻388真係好嘢，我睇有機會上到四百蚊！」一位身穿深紅外套的阿婆專業地說著。
「嗰個乜東東話上望五百添！」另一位帶著黑超的加入討論。
「五百就無咁易，388就一定有！睇個勢呢次個浪都幾實淨，北水長流長有，真係唔怕無成交。而且阿習近平俾得個市升，又點會俾佢咁容易跌吖！」旁邊比較肥的說。
「係啊，我女婿尋晚同我講啊，話媽咪，呢個市係國策市，只有調整但無咁易見底喎。既然仲有排升，千奇咪亂放啲股票啊！」紅外套專業地告訴姐妹們。
「計我話有智慧不如趁勢，放咁啲煤氣入388都好喎！」黑超說。
「咁阿君姐，你手頭有幾多港交所啊？」肥婆婆finally問中問題。
「菩薩保佑，十幾手點都有嘅……」「嘩！」我心中暗叫。
「唉你就好啦，我嗰排未到200蚊放晒，後悔到依家啊！呢幾日死追都追唔到，睇住佢係咁升，真係好抑鬱啊！」忽然旁邊殺出清潔姐姐加入討論……那一刻我差點連口中的奶茶也要吐出來。話到口邊但未說出口的是：「阿姐，又唔使咁快抑鬱，下星期重播《大時代》，可能大把人陪你啊！」