我哋成條Team去個客姍姐度開會，等咗成粒鐘先開到，個老細「黑面」都未出現。原來「黑面」上晝俾大老細捽完，心情勁差面都黑晒，飯都唔食就即刻召晒啲部門阿頭開會。「黑面」個秘書已經發出10號風球警告，姍姐亦提我哋邊個有玻璃心，最好做定防「瘋」措施，預備定紙巾去開會，頭先已經有兩個阿頭喊咗。
我哋啲同事話「希望在明天」，不如第二日再嚟Present，咁我哋仲有啲希望，唔係今日一定俾「黑面」打散。我叫佢哋咪傻，相由心生，「黑面」塊面咁黑，一睇就知佢心肺功能有問題啦。梗係長期受靶，條氣頂住個心翳住。好似便秘咁，一日唔通都唔舒服。要通梗係要揾人出氣，噴下人抒下壓，佢先順。我哋避得幾多？俾佢噴咪當買旗做善事囉，佢點名鬧，咪當電視慈善籌款出善長芳名囉。
我哋入到會議室，就有陣殺氣吹埋嚟，大家好似入咗恐懼鬥室咁，等住俾人鋸，同事都有啲淆底。果然，我哋Present咩，「黑面」都Kill。Ideas大屠殺之後，「黑面」就話：「我用咁多錢請你哋，你唔係交埋啲垃圾俾我呀嘛？」噴完我哋，再噴姍姐，「你個Job係要睇實Agency啲嘢……」，噴完就趕去開下一個會。
「黑面」俾咗「方向指引」，下面啲同事就開始做嘢， 姍姐叫我哋個設計改過少少顏色字款就ok，唔使大郁。「黑面」用一個鐘講嘅野， 姍姐用10分鐘就總結咗。「黑面」話啲嘢係垃圾，但無話唔要。同事話「黑面」咁忙，做咩仲要同我哋開會，嘥自己時間又嘥人哋時間。佢又餓又燥，我哋啲嘢幾好佢都感受唔到啦。我哋帶佢去玩跳樓機，佢都以為我哋逼佢跳樓！
同事唔明，「黑面」朝早俾老細捽完，就即刻不停見部門阿頭同Agency，見人就噴，根本係做緊Therapy減壓自救緊。人哋咁慘，大家應該合力打救佢，跟住我一齊唸心經：「左手右手直手摏佢心口」，用念力幫佢摏散度戾氣，以免佢頂心頂肺咁陰功。