公司個Management Trainee係老細千挑萬選揀出嚟，個樣零死角，身高168cm，一返工成間公司啲男同事都決定入伍當兵，其中最踴躍嘅係客户部兵頭。佢提出要俾MT學嘢，預埋MT一齊做pitching。
成個星期日日夜夜對住搞個pitch，幾sweet呀，佢呢啲咪係「幻想好性感，現實好骨感」囉。佢結果日日做埋MT嗰份，又要揾圖、又要砌Proposal，因為MT根本未做過。咁釘文件、影印做過喇啩？
真係唔明點解一個大學畢業生釘幾份文件都可以釘得咁hea。喂，1、2、3、4順序釘4張紙有幾難？佢唔係釘錯頁數，就係釘漏幾張，仲要一時釘左邊角，一時釘右邊角。咁隨意，又唔見佢隨意釘個耳窿喺嘴唇？結果份份文件都要拆釘再釘幾次，拆到文件兩隻角好似練shooting張打靶紙咁。
叫佢影印仲離譜，唔係影埋佢隻手指，就係影到歪歪斜斜，要嘥咗成二十幾張紙，先影到1張收貨，我叫佢貼疊廢紙喺枱頭，警惕自己唔好廢過啲廢紙，佢當堂喊咗出嚟。
兵頭叫我唔好咁mean，要俾啲耐性同機會啲新人。佢決定帶埋MT去開會，點知去到會議室set up，MT先發覺佢帶咗電腦但冇帶電線，而電腦又冇電，佢仲冇帶隻備份USB，因為出門之前佢太忙呀，忙住補妝，漏咗，好明顯佢都漏咗自己個腦冇帶。兵頭唯有棟篤齋講咗30分鐘，佢見到有個客恰眼瞓。咁都未算惨，之後兵頭叫MT send返個proposal俾個客，MT竟然send咗第二個客嘅proposal去，裡面有啲建議仲係一樣，擺明係環保循環再用啦！
係咁㗎喇，爭住做義勇軍，就要預咗壯烈犧牲。之後。兵頭立即宣布退役，冇咗生意事小，冇咗面子事大。咪以為退役就冇事，豬一樣嘅隊友，一樣會令大家「躺著中槍」。有日MT覆個friend WhatsApp，覆錯俾佢個部門個group：「公司男神都冇個，啲男人全部唔掂，著衫冇咩taste，講嘢又悶。有個幾nice，不過個look真係麻麻，而且係個成四十幾歲嘅大叔，腳短仲著韓式窄腳褲。」
吓，嗰位「大叔」一直自覺係型英帥，而且佢只係三十幾歲，佢咪就係兵頭囉！再咪話我唔提你，披住人皮嘅豬殺傷力勁過核彈。