做黃賭毒新聞追蹤有很大風險。
在週刊做黃賭毒新聞追蹤，確實存在很大的風險。
上次講到在深圳放蛇踢爆一個fing頭場，跟住我就畀大圈幫一個大哥約出嚟飯局，好彩佢亦通情達理冇難為到我。
不過有一次我哋喺香港放蛇，進入一個律師高級會所，故事出左街之後就冇咁好彩喇。
嗰個場喺尖沙咀寶勒巷，地點甚為隱蔽，冇熟人介紹一般都入唔到去，因為上址經常有一班大律師同律師出入，點解咁吸引呢？因為當時香港的私人會所，主要的陪酒女都是陀地和北妹，但係嗰個場就主打鬼妹、日本同韓國妹，由於比較另類所以吸引咗唔少玩家到來捧場。
據線人回報入邊玩得好癲，經常會有桌上脫衣舞欣賞。香港一位出名嘅大狀亦常出沒。
在警察術語中，Take Police interest，就係警方對這些事情感到興趣。相對於媒體，就係Take Media interest囉。當然如果唔係名人，我哋都唔會有多大興趣的。
放蛇嘅基本法就係，第一，先要諗辦法點樣滲透入嗰間場。
開夜場當然都有場主，香港嘅夜場娛樂事業，來來去去都係十班、八班人搞，要搵到個線頭都唔難嘅，然後呢就要搭通天地線搵到個場嘅搞手同經理。
也就係透過中間人介紹，然後至可以訂位。當然對方亦會問得好清楚定位嘅客人係乜嘢身份，我哋啲記者同特約人員，由于有中間人認可，最後都可以矇混過咗關。
上咗去兩次消費都唔少，但係未發現我哋嘅目標人物。同經理混熟後他表示大律師最近確實好少過嚟。
由於這題目已經在編輯會議上上左版，所以只好收網，同時亦幸運地發現一名財經名嘴，也是場內的客人。當然我哋亦都入唔到佢房間，唔知佢喺入邊點玩法。但相信同放蛇人員嘅玩法沒有兩樣吧。
韓國妹出位嘅桌上脫衣舞相都俾我哋影曬。這個故事東拉西拼亦湊合可以出街了，當時衹能以一個小封面處理。
週刊出街之後第二日，中間人即刻打電話畀我哋，話大件事，俾人追殺要著草避一避。
由於我哋古仔出街之後，嗰個場即刻要停止所有色情活動並惹來警方查牌，換言之冇運行，於是立即追查點解會引到班記者上嚟放蛇。
一查之下中間人無所遁形。
那個高級淫竇的幕後老闆大動肝火。誓要揪出我方的記者和放蛇人員，江湖消息對方出了不少暗花。
確實財可通神，由於我方記者之前也曾在風月版混過，經對方抽絲剝繭後鎖定了身份，記者亦發覺在離開週刊期間曾被人跟蹤。
為免鬧出血案，我亦吩咐了該名記者暫時不用上班，Work from home就可以了。
雖然這事最後亦不了了之，但記者亦有一段時間提心吊膽，也是做這類新聞的後遺症。