政治氣候懨悶，就轉睇美帝之新聞，真係好似拍戲咁樣，相當刺激好笑。
美帝選了個侵侵總統，外界覺得大鑊。都幾㗎，因為佢之行為，真係幾瘋狂， 完全將奧巴馬做嘅嘢，全盤打散晒。
呢啲嘢真係好奇。傳統智慧係，響美帝兩黨輪流執政之下，政客各走極端係冇運行，於是兩黨只能夠向中間靠攏，結果就係政策大抵都係中道為主，兩黨即使輪替，大方向好難一下子扭轉。點知侵侵當選後，真係來個大轉彎，唔理乜嘢叫中道，總之就走到最極端，拆爛晒奧巴馬之東西。
我都好奇，究竟發生緊乜嘢事，於是我就去追蹤一下，究竟侵侵啲fans係乜嘢款。依家面書世代，個個只會響朋友之comfort zone過活，好易迷失咗，日日圍爐取暖係唔得嘅。佢地之論據，係，得啖笑，但就告誡咗大家，聆聽之重要。
其一，有素來係美帝民主黨票倉之一個小鎮，鎮民投民主黨幾十年，今年真係忍無可忍，好多人投對家共和黨。有老餅話，因為八年來，睇住身邊鄰居朋友，冇工開，冇飯食。所謂change，變成一堆自由主義信徒(左膠啦，香港青年術語)掛帥之離地操作，例如氣候變化，同性婚姻等東西。佢話，呢啲唔係唔重要，但依家要飯碗，係咪？冇飯開，小鎮啲人走晒，個小鎮會玩完！
其二，有左膠大反省(響《衛報》寫㗎)話，過往八年，係美帝最分化之時期。作者係大左膠，睇住奧巴馬將所有最極端最具爭議最具左膠力之議題，利用行政命令等手法推出來，令到社會進一步分化，更令到進步力量裡面都出現咗互鬥。因為進步力量覺得，自己爭取之東西，忽然得到政府支持通過咗，雖然成功爭取，但就令自己之存在感忽然冇咗。為咗刷存在感，於是就走向更極端之議題，不斷自我分化。後果呢？左膠之選票自己拆開晒，互鬥到不投希拉莉，因為希拉莉唔夠左。Well……。
其三，右膠大反省，覺得過往幾十年之選舉操作，養咗一班華盛頓靠政治搵食之利益生態圈：記者、傳媒老細、名嘴、政治公關、政治顧問、政治marketing、寫手、網上kol等等。呢個生態圈，只係靠大商家政治捐款而生活，個個over-pay，滿口政治正確之語言，壟斷咗公共政策之想像，長於搞嗰啲精英到唔恨又火星文之論述，基本上同正常美帝人民脫節。侵侵之出現，其實就係對呢個生態圈之全面否定。因為侵侵從來唔係好用呢啲華盛頓語言去操作政治，唔係滿口自由主義價值或者仁義道德，而係跟住普羅市民口吻去走，就貼地都唔恨。右膠認為，唔單止民主黨要檢討，共和黨都要檢討，點解離地到出奇呢？
我就未必同意呢位右膠之分析，但值得大家思考一下，究竟係美帝社會有病，定係個總統有問題呢？