最唔明白就是I.T在大陸的營業額並不算標青，沈生又何必要同香港年輕勇武過意唔去呢？
這星期香港的潮流界「Meme」必定是罷買I.T行動！事緣明星足球隊與「一哥」鄧炳強的飯聚，貴為I.T老闆的沈家偉竟然也是座上客之一，先不談論甚麼政見與良心，今次沈生的飯局事件引起的連鎖效應，令我更好奇的是，其實大家有幾耐冇去過I.T買衫？
要講人就先由自己講起，老實說曾幾何時與I.T的關係都幾密切，「週刊潮記」出身的我曾經每星期都依靠I.T代理的品牌，去完成大量不同的稿件，後來轉職Freelancer初期，甚至亦為I.T編寫旗下品牌的Press Release，關係一度由「公關與編輯」升華成自己個客。所以今次公開評論I.T，又算不算是Bad-mouth個客？無所謂啦，反正已經係Ex-客啦！
其實I.T有段時間都幾代表到「新世代」，大概是15年前左右吧！那些年I.T與D-mop之間的競爭，就如每年西甲巴塞鬥皇馬的狀態一樣，當年I.T代理的RAF SIMONS、N.HOOLYWOOD、mercibeaucoup,、Gareth Pugh全都是一時之選的新世代品牌，全盛時期更將中環的安蘭街打造成「港版南青山」，然後再到中環雪廠街版圖及銅鑼灣希慎道1號旗艦店，然後，就再沒然後了！
對於買潮物的人來說，同一品牌在不同店舖買都有不同的效果，間接展現了自己的品味和態度，所以絕對明白十幾年前手揸一個D-mop粉紅色紙袋是幾咁有型， I.T亦同樣，那些年會覺得有型的裝潢，今日再回頭望只有過氣的懶有型感覺，與那些「廢老歌手」攬住堆流行經典50年金曲打J有咩分別，最大穫都莫過於I.T Outlet，以噸計的過季時裝加埋烏燈黑火的裝修，正宗的時裝墳場，每次經過都覺得入面充滿怨念，打幾多堂齋都超渡唔到！
十幾年前I.T在中環安蘭街開設COMME des GARÇONS、Ann Demeulemeester、MAISON MARTIN MARGIELA等專門店，堪稱為「港版南青山」！
烏燈黑火真心有型咩？只會令人對過季的潮物更冇胃口吧？
I.T的墮落，錯不在老闆的政見取向，亦錯不在旗下代理的品牌，像是Off-White™、Palm Angels、snow peak、Stone Island都是對年輕人胃口的東西，早陣子更簽下AFURI拉麵開拓飲食版圖，所以最大問題出處，就是「去I.T買衫」已經變成一件唔會令人覺得有型的事！加上當下網購太方便，想入手的品牌就算連運費後都平過你I.T，老實說罷不罷買，I.T都是翻身無望㗎喇！
好在代理品牌的專門店要跟返外國唔會亂嚟，例如Off-White™尖沙咀店有落地玻璃望維港，不過能夠買Off-White™的地方實在太多，不用幫襯I.T貼錢買難受！