近年好多人提倡「低碳生活」，例如多搭地鐵或者巴士等公共交通工具，但要「食肉獸」食少啲肉真係唔係咁易。雖然市面上有唔少素肉產品，不過同真肉比都係差少少，咁試下來自美國嘅植物製牛肉「Impossible Foods」，或者會有唔同感覺。

「Impossible Foods」由來自美國團隊研發，成份包括水、織紋小麥蛋白、椰子油、馬鈴薯蛋白同埋豆血紅蛋白(「血紅素」)。血紅素於自然界十分常見，有科學家認為，血紅素係真肉有「肉味」嘅關鍵。呢款植物牛肉不含膽固醇，但蛋白質比動物肉高20%，製造過程更可以減少75%用水量，87%溫室氣體排放量及95%土地使用量，夠晒環保！

Ray昨日去元創方隔籬嘅Happy Paradise試過，雖然仲未有真肉咁好𡁻，但的確比素肉更好食，行政總廚May Chow話，素肉通常煮極都係同一個質感，但植物牛肉就可以模擬真牛肉，做到唔同生熟度嘅效果。依家仲可以去其他合作餐廳，好似Little Bao，或者名廚Uwe Opocensky主理嘅Beef & Liberty試下。Impossible高級副總裁(國際業務)Nick Halla話，相信「Tasting is believing」，所以暫時只可以係餐廳先食到，遲下再進軍零售。

其實李嘉誠旗下維港投資都有投資Impossible Foods，維港投資負責人周凱旋昨日仲話，誠哥好欣賞植物肉，最喜歡就係「牛肉」餃子。誠哥都睇好，相信大家日後都唔難食到啦！