時代廣場最近與西班牙巴塞隆那畢加索博物館合作，首次將當地著名藝術家畢加索的傑作運出國外展出，成為藝術界一時佳話。雖然今次「畢加索與積琪蓮」系列展覽只有13幅畫作展出，但係能夠畀館方放心喺一個鬧市的商場內展覽，簡直係「西班牙一小步，香港地一大步」。
對於畢加索描繪佢「最後情人」咁浪漫嘅系列可以嚟到香港，Ray都好想知道嘅故事，咁啱前幾日去觀賞時，就撞到九倉執行董事凌緣庭(右圖)，靚女ED娓娓道來，原來係佢親自去西班牙傾返嚟。
年中同不少世界各地博物館頭目見面的巴塞隆那畢加索博物館，最初點都唔多理解一個商場同畢加索有咩關係。凌緣庭於是向館方代表分析：香港人好忙碌，平日放假如果專誠去博物館睇展覽，未必個個都會花呢啲時間，但如果喺鬧市商場內，交通又方便，又可以家庭樂，睇完展覽再周圍去，成件事就唔同晒。
雙方為事件往還一年多，終於成事，點知臨出發前，西班牙政府突然出手，再問得好仔細，梗係啦，話晒展出嘅都係國寶，好彩最後都過關。為咗達到館方所有要求，時代廣場喺Living Room Museum做足一切保安措施，唔單止加強保安人手，仲有係保住啲畫唔潮濕，13幅畫作裡面有10部抽濕機保持乾度呢！
