機艙服務員俾人的感覺係可以周遊列國，見多識廣。未入呢行我都係咁覺得，但原來這真的是個大謬誤！第一次聽lock & seal(外遊站完全唔出街，鎖自己喺房)，心諗：講笑咩！做得呢行有乜可能唔出街。但出乎意料的是幾乎個個外站都有人咁做，甚至包括歐美。飛十幾個鐘鎖自己喺房叫外賣，有人甚至長期帶住個煲，食幾日公仔麵……lock & seal竟然係大部分cabin crew外站的狀態。
有人同我講因為來來去去都係去相同的地方，去幾次就厭；有的為慳錢，有的費事走來走去，所以即使同一個地方去上萬次都唔會知當地有咩特別。雖然理解，但我就真係完全接受唔到鎖自己喺房超過半日。
我好珍惜每次外站的機會，每個地方的日落都跟香港唔同，點會厭？同菲律賓人傾下塞車問題、同北京小販為水蜜桃討價還價、聽上海女人嗌交、隨杭州人炒一炒茶葉、喺三藩市個碼頭聽雀叫一個下午……就算蕩失路，只要確保安全，都係一次經歷。每次做到好攰或者無動力返工就會同自己講，捱多陣就可以去到其他地方，一切都值得！咁就可以排走工作上的「廢氣」，亦都係我入行目的，旅行先係王道！你估真係interview講鍾意洗廁所咩。
詩人席慕蓉說「青春是一本太倉促的書」，時間太少，世界太大。我只希望年老時翻開這發黃的扉頁，不會用追悔的眼淚一讀再讀。
肥、毒、宅的空中服務員。