雪靴牌子Moon Boot推出春夏系列新品。
最近翻出以前趁減價網購嘅一對Moon Boot短筒雪靴。呢個意大利滑雪品牌其實幾好著，價錢又唔算貴，不過香港天氣始終唔算好凍，一個冬天最多都係著一兩次，平時都冇乜機會出場。
早排心血來潮上網睇吓，先發現原來Moon Boot唔止得雪靴，仲有春夏系列！而且顏色仲幾搶眼，粉紅、橙色、紅色呢啲日落色調，好有夏日氣氛，大熱天時都一樣可以著到。
品牌最近推出嘅2026春夏系列第二波新品，主打戶外休閒風。向來以雪靴聞名嘅Moon Boot，今次將佢哋一貫嘅舒適感帶到夏天鞋款，推出涼鞋、拖鞋同涼拖等設計，無論平時出街、行街定輕鬆戶外活動都啱著。
整個系列設計都帶住啲山系feel，以登山元素做靈感，例如繩索細節同尼龍鞋面，簡單得嚟又有型。款式方面包括Icon涼拖同拖鞋，以及Soft系列涼拖，睇落休閒又幾有特色。
另外品牌今年仲推出兩個新鞋款系列——Moon247同Moonlight。Moonlight係一款低筒運動鞋，鞋底紋理模仿山巒起伏，感覺幾有戶外風格。
Moon Boot 2026春夏系列而家已經喺官網同指定零售商發售。如果本身鍾意戶外風或者想搵對有型又舒服嘅夏天鞋款，都可以留意下。
ADVERTISEMENT
【👇立即追蹤👇】
