Asics Gel-Kayano 14客製新款叫人驚艷
如果一對波鞋可以令人第一眼望落去，以為真係生咗層青苔喺鞋面，咁你就知道呢位藝術家真係有料到。
來自美國西雅圖的菲律賓裔鞋履藝術家Ant Kai，近日公開最新客製作品「Moss」，以Asics Gel-Kayano 14為藍本，靈感來自長滿苔蘚的岩石，將原本充滿機能感的跑鞋，變成一件帶有自然生命力的藝術品。
Ant Kai最厲害的地方，從來都唔係幫波鞋「改色」咁簡單，而係將文化、工藝同故事融入作品之中。今次他先以灰色網布作基底，再覆蓋麻布質感物料，最後一針一線縫上立體苔蘚刺繡，令鞋面猶如真正被植物慢慢侵蝕。就連Asics招牌Tiger Stripes都換上苔蘚紋理材質，更一路延伸到鞋頭，令整個植物主題更加完整。
為咗避免畫面太「森林系」，鞋身的金屬銀色覆層特意做舊及刮花處理，營造風吹雨打過後的歲月感，再配合粗獷繩索鞋帶及不對稱塗裝鞋跟，每一個細節都經過精心計算，令自然與工業感取得微妙平衡。
Ant Kai是一位自學成才的藝術家，現居西雅圖。多年來一直將亞洲傳統工藝、流行文化，以及個人美學融合到客製波鞋之中，作品不單止夠靚，更有故事可講。自2020年全職投入創作後，他的名字迅速在球鞋界打響名堂，作品曾被 Michael B. Jordan、Kyrie Irving、Tom Brady、Daniel Arsham、Ben Affleck等名人著用，可見其創作實力早已獲得不少重量級人物認可。
品牌合作名單同樣相當誇張，UFC、Balmain、NFL、The North Face、ANTA、Nike Diamond、adidas、Toyota、Dunkin'、Jarritos、Rit Dye等都曾找他合作，每次都能透過客製工藝，將原本熟悉的鞋款或產品重新演繹，賦予截然不同的生命。
講真，我本身都幾鍾意Asics Gel-Kayano 14鞋款，覺得佢本身已經係近年最靚、最耐睇嘅復古跑鞋之一，Ant Kai今次改裝真係令我有啲驚艷。佢冇因為想突出自己而將原本嘅鞋型完全蓋過，反而好尊重鞋款本身嘅線條，再透過青苔刺繡、做舊金屬質感同各種細節，將成對鞋變成好似一塊被大自然慢慢侵蝕嘅岩石。明明加咗咁多元素，成件事又完全唔會覺得累贅，反而愈望愈有味道。
