巨型Poké Ball變身真人睡眠艙

如果你係Pokémon粉絲，見到「巨型Poké Ball可以入去瞓」呢句，應該已經忍唔住心動。今次Pokémon Sleep聯手日本住宿品牌NOT A HOTEL，真係將大家最熟悉嘅紅白Poké Ball放大到真人尺寸，變成一個可以住人嘅睡眠空間，而且仲放喺北海道大自然之中，預計今年9月登場。

概念其實幾靚，Poké Ball喺Pokémon世界入面，本身就係讓Pokémon收埋同休息嘅地方，今次只不過將比例放大，變成人類都可以入去瞓。加上Pokémon Sleep本身就係一款以睡眠為主題嘅遊戲，將虛擬世界搬到現實，成件事確實幾有夢幻感。

不過，先唔好急住訂機票。據目前資料，呢個Poké Ball並唔係一般酒店，亦唔係開放俾公眾預約入住，而係受邀人士限定嘅活動。即係話，普通Pokémon粉絲並冇得申請入住，今次基本上係「有得睇，冇得玩」。

呢點對真心愛Pokémon嘅人嚟講，未免有少少殘忍。想像下，你千里迢迢去到北海道，見到一粒巨大Poké Ball靚靚咁放喺草地或者森林之間，可以影相、可以羨慕，但入面發生咩事就未必輪到你知。更加唔好講瞓一晚——呢個夢想暫時只屬於受邀人士。

官方目前亦仲係收收埋埋，暫時只公開咗球體外觀，至於入面嘅設計、床、材料同整個睡眠體驗，都要等9月15日至正式揭曉。

我自己最想知嘅反而係一個好現實嘅問題：圓形屋入面究竟點擺傢俬？張床會唔會都係圓形？啲嘢會唔會全部慢慢碌晒去中間？

不過講到底，呢個企劃最吸引嘅地方，始終唔係建築有幾厲害，而係佢將一個由細玩到大嘅Pokémon元素，突然變成現實世界真係可以走入去嘅空間。對粉絲而言，單係見到一粒巨大Poké Ball出現喺北海道，已經足夠令人興奮。

對日日玩Pokémon GO嘅I人嚟講，呢粒嘢根本唔係普通「期間限定住宿」，而係一個本來應該屬於我哋呢班 Pokémon 怪人嘅夢幻場景，結果話你知：sorry，唔招待你。

有得睇，無得玩，好無癮。