快閃澳門：摩珀斯美學地標 為視覺與味覺100%充電
講真，近期人人興北上消費，大排長龍羅湖過關，我個人就真係不太熱衷。反而上船去澳門，過一個兩日一夜嘅精緻短線遊，唔使同人逼，節奏自己掌握，輕輕地幫自己充一充電更啱我口味。今次同大家玩番轉輕奢出行，唔玩落俗嘅金碧輝煌，純粹去搵下設計靈感兼食好西。新濠天地摩珀斯(Morpheus)正合我意，呢座由已故建築女爵士Zaha Hadid操刀嘅巨作，外觀好似由鋼鐵織出嚟嘅科幻雕塑，甫踏入大堂，成個人好似置身前衛嘅藝術宮殿。最震撼嘅係搭埋個極速全景觀玻璃電梯，由地下直達34樓睇住網狀鋼骨結構喺眼前極速交錯，個視覺張力真係世界級。
顛覆視覺│當代美學建築
其實呢度最啱設計藝術迷(即係我)，周圍都藏住尋寶密碼。最吸睛嘅一定係街頭藝術大師KAWS嘅巨型雕塑《Good Intentions》，亦有當代藝術大師村上隆標誌性嘅太陽花作品，直情好似將當代美術館搬咗入酒店。另一個非去不可嘅打卡位，一定要留返畀位於40樓嘅天際泳池。喺呢個離地面130米嘅高空之中寫意暢游，隨手一影都係充滿張力嘅大師級作品。
一生必睇│水上史詩巨作
兩日一夜重頭戲之一——《水舞間》。呢個真係名副其實「一生必睇」嘅殿堂級巨作，最神奇係個舞台可以喺幾秒鐘之內，由水深達奧運泳池五倍嘅巨型水池變成乾爽嘅陸地。成個匯演糅合咗淒美嘅穿越時空愛情故事同高空特技，一幕幕驚心動魄嘅高空跳水加上電單車特技，成個編排節奏緊湊毫無冷場，睇到全場瘋狂拍手掌，確實名不虛傳。
舌尖交響樂│天頤與風雅廚
作為Foodie嘅我對於「食」當然既講且究，晚餐朝聖咗21樓空中走廊高級中菜廳「天頤」，一邊望住窗外幾何鋼筋結構一邊食「新中式創意宴 ·夏長」四手聯乘菜單。最驚艷嘅係一道魚子糟滷花咲蟹肉蛋白珠，行政總廚黃贊奇將傳統糟滷做法摩登化，蟹肉鮮甜細嫩，幽幽嘅酒香加上魚子醬爆破出嚟嘅鹹鮮，層次高級又玩味十足。第二日午餐就留咗俾風雅廚(L'ATTITUDE)，先嚟一道經典嘅手切牛肉他他(Beef Tartare)，牛肉切得極其精細，調味點到即止，保留咗頂級牛肉嘅脂香。而我個人極力推介嘅係佢哋嘅手工短管意粉配豚肉(Mezze Maniche pasta, variations of pork)，短管意粉煮得煙韌有咬口(Al dente)，掛滿慢熬嘅豚肉醬汁，加上香口炸豬皮，鮮美濃郁，極具大師級小館風範。兩日一夜，我的視覺與味覺已完成充電。人生苦短電池壽命亦然，工作再忙，記得久唔久去叉一叉！
ADVERTISEMENT
【👇送皇玥中秋月餅👇】
