同一段路程，價錢差一倍？Call車App的報價有古惑！
在深圳叫車，同一個起點、同一個目的地，兩部手機分別打開滴滴同高德，價格可以相差足足一倍！我們昨日由深圳深業上城的文華東方東灣餐廳返鹽田約廿公里，我用滴滴叫車報價60至80元，表弟用高德，同樣路程、同樣車款，30幾元就落到單，落差之大，令我又金田一上身了。
之前聽很多司機講，偏好接滴滴訂單，因為平台結款更快；但今次實測，反而高德更平一半。其實兩個平台底層邏輯不一樣：滴滴本身主營打車平台，車源、定價系統都由自家主導；而高德本身並非車隊，只是聚合平台，同時接入好多間第三方車行，多個供應商互相競價，價格有機會壓低。
最令我意外的是，表弟用滴滴也比我便宜！原來忠實客戶冇著數！因我長期頻繁落單，平台會判定我屬於高黏着、剛性需求用戶，報價傾向偏高；但若一段時間唔用，帳號變成「沉睡用戶」，平台就會放出優惠平價、補貼吸引客戶回來，價格即刻回落。花心啲，慳多啲！
