比利時六子之一嘅 Dries Van Noten，雖然本人已經功成身退，但品牌完全冇放慢腳步。由接班人Julian Klossner接手之後，首個2025秋冬系列表現算係穩打穩扎。近年品牌更加走「畫廊式概念」，將美學同藝術放喺核心，唔再只係買衫咁簡單，而係透過香水、材質、家具等元素，俾客人用感官去感受品牌世界。
最新一站落戶日本，但唔揀潮流集中地東京，反而揀咗充滿歷史味道嘅京都。呢間全新畫廊概念精品店，會主打精選美妝系列同時尚配件。繼巴黎、布魯塞爾同米蘭之後，京都店成為品牌喺日本嘅第四個據點，亦係用更立體方式詮釋Dries Van Noten美學嘅重要一站。
專為京都而設嘅空間，主打香水、美妝產品同配件。一入門口，就會見到以十八世紀佛蘭德斯紡織品做背景嘅配件牆，氣氛即刻好有畫面感；由Ernest Igle Hoffman設計嘅書桌造型感十足，成為全店視覺焦點。空間入面仲用咗由岐阜老字號燈籠工房大關製作、野口勇設計嘅「AKARI」吊燈，柔和燈光加上濃厚日式風格，配合黃色絲綢展示位同大理石枱面，層次感相當豐富。
店內會推出完整香水系列、可替換唇膏同美妝配件。當中最吸睛一定係品牌標誌性嘅10ml旅行裝香水噴霧，設計靈感來自Dries Van Noten一貫嘅「不可能組合」美學，用上充滿異國風情嘅便攜盒包裝。禮盒入面包括印花外盒同三支可替換噴霧瓶，實用之餘又好有收藏價值，送禮自用都啱。
同品牌其他城市嘅畫廊概念店一樣，京都店唔只係一個賣嘢嘅地方，更加似一個可以慢慢行、慢慢感受嘅空間。透過造型、材質同香氛，俾人用最直覺嘅方式去體驗「美」。藝術品、家具同產品自然地融合，令你用五感走入Dries Van Noten嘅世界，同時又同京都本身嘅文化氣息互相呼應，預計會成為品牌喺日本一個全新交流據點。
Dries Van Noten Gallery Kyoto
地址：京都市中京區河原町通山崎町251號京都BAL 1F
營業時間：11:00-20:00
電話：075-211-2010