人在九千幾公里以外的英國,我關餅氏是為食師奶,怎會不掛住香港的味道,魚蛋、燒賣、燒味、菠蘿包、蛋撻、茶記奶茶熱檸茶⋯⋯其實在英國都食到飲到,只不過當然不會像住在香港,想食落街就買到咁方便。而家想食就要專登坐車出去巿中心,幸好我家附近有巴士直達,不用40分鐘車程,都算方便。巿中心有齊酒樓、茶餐廳、港式麵包店、華人超巿(通常簡稱中超)。
中超,絕對是身在英國的華人尋找家鄉味道的shopping勝地,來自中港台,還有日、韓、東南亞的食品、飲品、醬料都買得到,有些規模大到連海鮮檔都有,亞洲貨品選擇比香港的超巿更琳瑯滿目。論香港貨,價錢當然比在香港賣得貴,以一pack 6盒250ml裝維他檸檬茶為例,有中超賣6鎊幾,計返匯價十幾蚊港幣一盒,真係唔捨得買來飲呀~不過,而家在英國本地超巿(簡稱英超)Sainsbury's 都有得賣了!對於在英國的香港人來講既驚喜又感動,畢竟維他檸檬茶陪住香港人成長,以前唾手可得,現在嗒落有味,啖啖都充滿情感。現在去英超都買到,而且是散裝發售,價錢𣎴算貴,250ml賣£0.75,還有維他菊花茶(250ml/75便士)、麥精(250ml/55便士)、維他奶(250ml/55便士)、朱古力味豆奶(250ml/75便士),間中買來滿足一下思鄉的味蕾都不是好重皮嘛,而且屋企附近就有Sainsbury's,要買行一陣就買到,方便好多。
作為一個師奶,不論以前在香港,還是而家在英國,行超巿絕對是日常活動。近來行英超Sainsbury's、ASDA、ALDI,發現亞洲區貨架都明顯多了選擇,有零食、醬料、麵類等等,在Sainsbury's有得意動物餅、旺旺果粒多提子味飲品、印尼撈麵、韓國泡菜、泰國椰漿味花生、台灣芒果凍⋯⋯在ASDA就見到楊協成清涼爽、韓國農心蝦條、明治熊貓夾心餅乾、日本紫菜⋯⋯還有數款韓國即食麵,例如辛辣麵、韓國國民級即食麵安城湯麵、農心海鮮辣湯麵。而一般常用的調味料,生抽、老抽、蠔油,就連味醂、日本清酒、米醋、小菜醬料包都有。所以當思鄉病發作,想食下熟悉的味道,而家去英超基本上都可滿足到,選擇當然不及中超,但始終聊勝於無吖!