最近股市非常暢旺，港交所閒閒地都有過千億成交，馬暈最近心情亦勁靚，就係因為低位買咗港交所，今年自己股市成績表超額完成，真係想學一學「芬佬」提早收爐放聖誕假。
但馬暈一班股民朋友就個個「鞋鞋聲」，因為呢班亡命炒徒成班都係鍾意高PE股份，成手賭股、科網股，食唔正最近呢個浪，睇人魚翅撈飯真係不是味兒。
唔單止係香港，大陸股市情況更加兩極。A股呢轉升到唔清唔楚，但係好多板塊仲無力過絕食中嘅之鋒，郁都唔郁下。由於太多股民見到指數日日升但係手上面嘅股票不賺反蝕，所以整咗個新潮語「蒼井空」，即係「滿倉踏空」、成個倉無一隻升咁解。
倉井空係其中一位最具人氣嘅日本AV女優，紅到去中國被尊稱為「蒼老師」，無啦啦畀股民改咗做股市潮語，可能蒼老師知道之後都要講句日文：「打咩！」
細心咁研究一下股市同日本AV市場又的確有幾分相似。股市有周期性，AV女優亦都係，大部分紅兩三年左右就會收檔，好似蒼老師從良之後仲係咁紅嘅、或者係長升長有嘅股份真係少之又少。
大牛市炒股最緊要係跟紅頂白，AV女優亦然，趁住自己當紅，一年出十套八套片搵得幾多得幾多。
其實炒股真係「蒼井空」都唔緊要，最緊要係轉身快，夠膽跟紅頂白炒番轉；最慘係做「上原亞衣」，個市「上完」轉熊，你真係炒咩都無運行！
