王石老矣

萬科收購戰愈演愈烈，寶能系已經持有萬科超過兩成二股權，成為最大股東，持股量超過華潤。萬科爭奪戰，可以講係大陸房地產同財經界近日最矚目事情，喺兵臨城下的情況，萬科主席兼精神領袖王石終於開腔，仲罵寶能系大老闆姚氏兄弟係「野蠻人」。

喺度先介紹吓啲資料背境，一般香港人未必好熟識萬科，事實萬科喺國內地位等同香港長實，創始人王石喺大陸地界產界可以講係教父級，係內地房地產老大，咁大家就明白，收購萬科係幾咁大件事情。

股市有股市規則

王石講到明話唔歡迎寶能系成為第一大股東，話寶能系信用同能力都唔夠，又話會拖累萬科信貸，接著批評寶能靠財技借貸發展業務，透過高借貨收購萬科，總之就係將寶能系踩到一文不值。

無疑王石對寶能的批評確係有理據，然而商業社會唔係靠「講」就可以，特別股票市場，有一套遊戲規則，依家好明顯寶能系喺現階段係萬科大股東，無論王石幾唔滿意，到最後都要睇邊個持有最多股份。

目前華潤集團只持有15.25%股份，以王石為首的萬科事業合夥人更只有4.14%，你王石加埋大股東華潤都唔夠兩成，自然就冇話語權，呢個係鐵一般事實，即使寶能系個底唔係咁靚，王石都要接受現實，只要冇違規做假，誰人擁有控股權，誰就係話事人。

風險管理不足惹狙擊

當然，寶能系要成功收購萬科並唔容易，特別萬科已經停牌，姚氏兄弟暫時唔可以喺公開市場搶股票，萬科或許透過配股以攤薄寶能持股，再唔係整個毒丸計劃，寶能收購都會被打窒。而且，市場啲長線持有萬科基金，都會較支持王石等管理層，畢竟王石係真心做生意及市場地位夠份量。

不過，沽勿論點，搞到被狙擊，好大責任係王石同華潤咎由自取，王石過去十年唔係去爬山就走咗去遊學，再唔係就跟小三拍拖，究竟擺幾多時間喺公司，佢心中有數。再講，九四年君安證券曾經狙擊萬科，嗰次成功擊敗對手後，王石你有冇汲取教訓，怎樣去防範重蹈覆轍，好明顯係冇。作為一個超級企管人或頂級企業家，廿年來都冇做好風險管理，王石責無旁貸。