港股連續兩個月橫行於23,500點至24,500點之間，雖然間中出現突破，但明顯高位有人食胡，低位又有人買返上去。二、三線股算係幾強勢，至於跟大市密切度最高的科技股，例如美團(3690)、阿里巴巴(9988)就非常接近底部，究竟今年的高位是幾多？會否再有高位？機會率有幾大？筆者試著用幾個方面同大家分析一下。
首先，根據過去多年的統計，其實港股的年波幅通常係7,000至8,000點，如果18,671是今年底部的話，大機會高位應該最少是25,671點。所以，我自己傾向認為高位未出現，尤其係今年成交比較暢量旺下，7,000點反彈可說是非常保守的統計。當然仍然有一個可能性，是低處未算低，即低位見18,000點樓下，以滿足7,000點的波幅要求，不過我覺得機會比較細。
其次，港股高度未必會真的好高，如果對比起上年7、8月時，港股大部分科技股的大戶持股比例其實幾高，所以到後來10月或者今年初的升勢，就會變得合理。但自從關稅戰以後，加上近月「內卷」的話題興起，從中央結算系統當中，可以見到不少新科技股的大戶減持情況都幾明顯。加上截至今年7個月計，港股連同配股、可換股債等融資額已經近2,000億元，通常經歷完大額的「抽水潮」之後，港股見頂的機會會明顯提高，所以現階段港股危險水平其實不低。
所以筆者認為今年港股的高位應該未到，但亦都不應該盲目覺得港股會輕易挑戰27,000點、28,000點的水平，相信即使到那些位置，高位「抽水」的情況只會更為明顯，亦都會迎接今年的頂位。