網上圖片
股壇長毛David Webb早前發表一份港股黑名單，蘋果日報拾人牙慧，選出30隻不宜沾手嘅香港股票，選取標準主要係股價在一年內大幅下跌、股份喺中央結算內高度集中，以及不斷配股抽水。
入圍嗰30隻股票，1年平均下跌幅度28%，有7成公司喺中央結算個倉位高達89-100%，9成公司過去兩年平均都有配股。蘋果叫呢幾十間公司做「不能買的港股」，Loser有朋友睇完就話，佢哋有冇計漏咗自己母公司壹傳媒（0282）呀！
過去Loser對壹傳媒搞網上業務及動新聞都頗欣賞，但搞咗多年毫無起色，再聽朋友嘅故事，對呢隻股票都改觀。
壹仔股價跌足十年
原來朋友喺2012年揸咗壹傳媒，當時高位曾見1.76元，壹傳媒上周五收3毫4仙，5年間股價年年下跌，足足跌咗8成，跌幅係咪仲大過啲妖股。攤長啲睇，你揸住啲賊股，當莊家收夠貨或賣盤，個別都可能有翻身機會；但你揸住壹傳媒，呢十多年簡直係不見天日，06年最高股價4.6，到今天跌咗9成2，可以講輸死人。
好喇，蘋果話啲衰公司股權高度集中，換個角度睇，壹傳媒啲股份集中度亦不低。港交所股權披露顯示，David Webb持有5.02 %股份，另有72.6%喺非中央結算手上，估計應係集團大股東黎智英或相關人士持有，將呢兩方嘅股份相加，都接近8成喎。
虛假新聞等同賣假嘢
至於經常配股抽水，壹傳媒就真係冇乜，之但係考慮到呢隻股票涉及嘅誹謗官司，風險度可以講十分高。遠嘅唔講，就係舊年跟霸王單官司，已經賠咗300萬，另外訟費千八萬；至於每年集團涉及幾多誹謗訴訟，雖然冇正式統計，但從媒體零散報道，十單八單都應該走唔甩。
坦白講，作為媒體機構，賣嘅就係資訊，新聞就係你嘅產品，而多年來，集團時有涉及虛假或自製新聞，如潘迪生患癌、霸王致癌，刊發呢啲不實報道，同一啲公司賣假嘢冇乜分別，做假嘅公司你話係咪值得投資？應唔應該列入黑名單？自行判斷喇！