阿迪達話阿仙奴電影紀錄片《All or Nothing》(孤注一擲)，他好忙只睇咗兩集，雖然紀錄片始終係剪接，被拍攝者知道有鏡頭，但難得睇到一支傳統列強內各人嘅全季心路歷程、管理運作，《孤注一擲》唔止可以係阿仙奴嘅未來報告，甚至係英超管理學教材。8集夾埋約400分鐘電影，睇到阿迪達喺高層力撐下就係要全清舊朝瘀血、老兵，重用年輕小將由頭嚟過，有一間英超球會跟緊，叫做修咸頓。
第二樣係錯咗要認、分手要狠，奧巴美揚續約後走樣「錢聚腳」，達Sir要殺一儆百，啲高層騰騰震驚孭鑊；好在阿仙奴一向當水魚嘅巴塞臨尾接手，輸少當贏。達Sir話見到奧巴眼神，已認定佢個心唔喺度；曼聯嘅坦帥，有冇望真啲C朗？最後，年輕人係未來，阿仙奴如今當個個係寶，但年輕人都可以唔進步，中堅加比爾馬加希斯上屆鬥狼隊回傳出事，喺電影中俾副領隊照過肺，叫佢踢得簡單啲；點知啱啱又出錯，好在球隊又係尾段反勝，歷史話咁快重演，唔知廠迷幾時等到04/05年球季「不敗神話」再現？
