「銀河唯一」的決心
高大中鋒早幾年貶值得快，尤其喺速率極高嘅英超，嫌佢哋走動少唔合潮流；但當世界上其中最勁嗰兩位領隊哥迪奧拿同高普，喺今夏重金購入新中鋒做爭霸籌碼，而呢兩位「高大威」夾埋歐戰，踢咗3分之1球季，已共入近30球，相信跟風者眾。畢竟喺歐洲冬季濕凍天氣，呢類前鋒大派用場；只見熱刺領隊干地近期鬧前鋒荒，下半場往往尾段大腳吊入禁區博亂、曼聯嘅滕哈格喺上周歐霸都叫中堅「麥麥送」臨尾出場打中鋒。富咸今屆係最強升班馬，都係多得大熟嘅塞爾維亞「坦克車」主導進攻，聯賽入波仲多過Big Six嘅曼聯同車路士。
英超以外，最勁嘅呢類中鋒，一定要提「銀河唯一」基奧特，踢過英超阿仙奴同車仔，俾杜曹踢走，轉戰意甲A米大派用場。36歲仍然有頭髮有腳法，今季踢咗18場入9球4助攻，上仗尾段入場奠勝，忘形除衫show肌攞紅牌；賽後話自己仲係後生仔，對足球仍有初心，擺明同法國主帥迪甘斯及隊友球王賓施馬挑機，咁fit，唔係唔入選世盃大軍啩。
