修夫基的百戰

作為三獅領隊，修夫基喺在任呢7年半，風浪唔多，暫時帶隊92場，勝率逾六成；但期間冇攞過大賽冠軍，最接近係上屆歐國盃，決賽射輸12碼俾意大利，「足球沒有回家」。但佢繼續有得撈，並得力英超近年受制FFP嘅財政公平競爭條例，列強重點培育咗唔少本土新人，源源不絕為英格蘭提供強大嘅兵器庫，每次大賽係熱門。

國家隊中場必然主力迪格蘭賴斯同祖迪比寧咸，今季喺所屬大會「升呢」可越踢越前，入球創個人新高；加埋新彈藥、曼聯18歲青訓防中高比文奴，盤扭技術好、體力無限，激活原本老化嘅曼聯中場之外，隨時係三獅今夏中前場變奏嘅殺著。英格蘭連同今晚鬥比利時剩返3場友賽，之後出戰今夏歐國盃3場分組賽並預計起碼入到8強計，即係話修夫基要帶隊達100戰里程碑應無阻力。只不過大會幫佢手執靚中場，佢自己都要盡快解決一前一後嘅隱憂；愛將中堅哈利馬古尼嘅穩健度成疑外，亦一直太過倚重箭頭哈利卡尼，只怕「足球再不回家」，三獅嘅宿命，又要等下一位繼任人去破。