Panic buy(搶購)，唔急唔搶，不過好似曼聯埋門花多1.5億英鎊買卡斯米路同安東尼馬菲斯，起碼先換來打敗阿仙奴嘅勝仗；而且紅魔嗰種搶，唔屬亂買係買貴。車路士急搶英格蘭樸達，連買起佢成個教練團，賠咗逾2,000萬英鎊俾白禮頓；樸達火速升呢教歐聯球隊，好似急咗啲，但自己就先穩袋1,000萬英鎊年薪5年約。如果車仔季前已易帥，「魔獸」盧卡古未必出走；現成嘅夏維斯、史達寧同奧巴美揚唔多啱新帥攻擊style；樸達留到兩季當贏，今晚歐聯先睇又換司機嘅「新車」！
過咗8月份先出現兩單免費轉會奇聞。韋利安同迪亞高哥斯達回歸英超，兩老2017年係車仔捧英超嘅重臣；韋利安叫做踢開巴甲，但叫佢英超再出場踢翼鋒都幾索氣。奇中奇係冇踢成年嘅「野獸」哥斯達去狼隊打中鋒，狼隊依家成隊葡國兵團識搓唔識射，之前已無厘頭買個2米高嘅沙沙卡拉積，結果踢咗45分鐘重創收工，今夏已使咗1億英鎊；又急急腳搵個踢開嗱喳波、跳唔跳得起都成問題嘅「野獸」重返英超，呢啲先可能係真正嘅panic buy。
