意國足球地震不停
今夏轉會窗特事特辦，提早開放但明晚又閂，只見英超列強快手搶人才，紅軍天價誓購德國天才、曼聯重金簽英超中游兩大王牌。曼城更狂最闊綽，最矚目暫時係簽得意甲應屆最佳中場、荷蘭國腳雷恩達斯，新陣代謝絕對唔手軟；務必喺115條罪名未知幾時殺到前，俾哥帥手執超豪兵團再度爭霸，英超之快總係令人期待。
PSG終替法甲爭口氣、西甲本土同巴西超級球星撐場，德國一向謹慎理財，保持競爭力，個個聯賽有賣點，最擔心係意大利足球。國米老化歐聯大敗，主帥恩沙基心淡去沙特掘金，又有國家隊試新人新陣出禍嘅主帥，大敗挪威即炒，國家兩大龍頭無首。其實意甲剛季已有9名主帥被炒，季後只係過咗約兩個星期，又有起碼8隊易帥，餘震不停，重建艱難。雲老退休離羅馬後，撬走阿特蘭大有料教頭加斯柏連尼；但踢返歐聯嘅阿特蘭大竟然用之前教羅馬、修咸頓十多場即炒嘅祖域頂上。良才良帥流出，只見意甲應屆三甲射手雖然全係土炮，但冇乜實力外流闖蕩，恐怕喺意甲繼續塘水滾塘魚。