最hea嘅倫敦球隊
自從默郡同曼市打吡聲勢大不如前，緊湊嘅倫敦打吡往往成為英超焦點；加上自從2020/21年度球季嘅富咸後，再冇首都球會降班，「倫敦七雄」爭霸會係阿仙奴、車路士及熱刺，後面嘅水晶宮、韋斯咸、富咸同賓福特主要想保命。倫敦兵團佔地理優勢作客唔太頻撲，喺長期密集嘅英超賽程會佔優，好似阿仙奴10月試過喺倫敦打造6連勝，啱啱3場倫敦比賽遇上硬仗攞2勝1和不敗，一周三賽捱得住都有一定地利同賽程安排原因。
倫敦球會嘅鴻溝近屆漸變模糊，爭霸者少但護級嘅最終又會大步檻過。好似富咸自從回升英超後，近3屆分別排第10、13同11位，年年穩定地hea踢英超一啲唔易。領隊馬高施華教咗富咸4年半，「長命」僅於哥帥及達sir，小球會唔需要大事擴軍應付多條戰線，佢哋前屆重金簽入阿仙奴嘅史密夫路維同今屆嘅巴西新星奇雲山度士都唔似預期，眼光麻麻但管理層壓力唔大。啱啱打吡又贏到名大於實嘅熱刺，聯賽連勝，今晚喺泰晤士河畔賞「月」迎曼城，富咸輕裝上陣，又睇下仲有冇驚喜。