歐聯遍布死亡之組

歐聯今晚正式開局，究竟整個歐聯版圖，有冇因為好多猛將去咗中東掘金而出現微妙變化，令到歐聯再唔係一、二名出線多無懸念嘅「無癮」格局，好快就知。計近3屆分組賽往績，英超每屆4隊入圍共12支參賽隊，錄得9次首名、2次次名出線16強；唯一「失威」係20/21年嘅曼聯，排第3跌落歐霸打到決賽失盃。西甲皇馬同德甲拜仁對上3屆全以首名晉級，反而法甲PSG近兩屆都係次名出線，無霸氣；而意甲每屆都有球隊分組賽「出事」，攞首名成功率亦低。歐洲5大之後，荷甲淪落，但葡超醒神；雙雄賓菲加同波圖上屆同做小組一哥，而東歐及北歐球隊，注定係炮灰。

今屆奇兵係A組加拉塔沙雷、C組布拉加、E組飛燕諾同F組紐卡素，死亡之組唔只係F組；對應嗰組嘅曼聯、拿玻里、馬體會同A米要打醒精神，其中季初5戰3敗嘅曼聯，明晚作客拜仁，跟住次輪主場鬥星光熠熠嘅「土超奇兵」加拉塔沙雷；究竟歐聯係紅魔主帥「坦克」嘅翻身戰定催命符，要睇吓一班新兵爭唔爭氣！