車仔冇火最擇使
阿仙奴近季同以前好唔同，一班小兵嘅「火」都好大，球會已連續兩個月被指未能有效控制球員喺場上嘅行為，共判罰10多萬英鎊；某程度亦反映隊波爭勝心熾熱，贏場波又當攞咗冠軍咁，非常熱血，未出事前，呢班「兵」啖火唔係壞事，只要唔好學曼聯卡斯米路叉頸停3場。
唔少評論認為，車仔只要俾時間主帥樸達，好似當年阿仙奴對待阿迪達一樣，終有出頭天；但車仔最大問題正係冇火！樸達場內似乎係一個偏向文靜、思考型嘅主帥，只見隊波冇咗受傷嘅艾斯派古達同堤亞高施華兩位後防大佬，唔再見有領袖球員壓場，提點隊友，鼓動士氣。好似翼鋒薛耶治啱啱鬥熱刺場波，俾人挑釁撞背脊，出手還擊幾乎食紅牌，有冇隊友上前「幫拖」勸阻同球證拗數？有時適當跟對手、球證拗兩句，俾隊友回氣，重整領隊要求嘅戰術，係爭勝伎倆之一；但只見樸達亂入一眾前鋒後備上場搏殺，包括全無鬥心嘅奧巴美揚，只怕下周中歐聯鬥多蒙特過後，樸達同前帥杜曹半年前命運一樣。
