艾寧夏蘭特近年在英超橫行無忌，掀起大球會搶中鋒熱潮。英超射手榜目前頭10位有6人係正中鋒，夏蘭特入咗11球佔球隊入球率65%；其餘桑馬迪達、禾達美迪、伊戈泰亞高同韋碧克已各入4球(未計周一英超)，但瑞典兩大神鋒伊沙克同約基利斯，仍未顯示在前球會的威力，而曼聯嘅施斯高仲徘徊正選後備之間。不過球季準備進入寒冬，預期各中鋒憑身高優勢在場濕地滑大派用場，「9號位」嘅入球比例會進一步上升。
現今頂級中鋒要又高又快，不時喺前場奔跑，滿足領隊高位壓逼戰術，所以現時成個射手榜最值得表揚係下月35歲嘅韋碧克。「韋帝」曼聯出道，高低起跌，滿身傷患，但一身好武功，早年已有網民作神曲向佢致敬。如今已係個人第19屆出戰英超，上屆首次取得雙位數英超入球，今季鬥車仔同紐卡素又各入2球，頂級戰力似無窮無盡，32歲嘅白禮頓領隊都唔敢換走佢。嚟緊禮拜六韋碧克將會降臨奧脫福，又睇下呢期一樣咁紅嘅「師弟」馬古尼點嘜實佢。