麥巴比更需要皇馬

麥巴比，球王認證欠歐聯冠軍；最近自行公布將會離開効力6年嘅PSG，今夏回復自由身，外界預期加盟皇馬。有麥巴比嘅PSG，今屆稱霸法甲又係十拿九穩，歐聯16強首回合輕取西甲唔係頂級嘅皇蘇，好有機會突破對上2屆16強出局嘅魔咒，籤運有助唔係實力進步。PSG嘅卡塔爾老闆玩咗咁多年都冇突破，美斯和尼馬相繼離隊，連麥巴比走埋都幾無癮。

贏盡歐洲5大聯賽嘅安察諾堤，原本見冇乜挑戰會轉教巴西，但轉軚續約皇馬至2026年，心中有人。皇馬今季簽到英格蘭明日之星祖迪比寧咸，原來推前打中鋒都得，一大發現；聯賽又打謝巴塞，搞到對方教練沙維頂唔順話今夏走人，上周歐聯半力贏德甲RB萊比錫，英超太激烈內耗嚴重，皇馬今屆未必好似上屆4強輸畀曼城。皇馬盤數好靚仔，據報人工開支已降到54%(規例不能逾收入嘅70%)，來季放走莫迪歷同卻奧斯呢類高薪老兵，球隊進一步年輕化；其實有冇麥巴比，喺西甲、歐聯都係超班，難怪有傳麥巴比要減啲人工先可過檔，似乎有人更需要馬德里，認證做新球王！