上周與政壇元老食午飯。餐廳電視正播住財爺的新聞，隔籬枱之中產睇到扯火也。
我問元老，政府明知市民對預算案反應強烈，點解唔肯讓步？
元老笑曰：唔好當班政府官員係傻的。他們比起你同我更了解民情。
元老跟手夾件燒賣俾我，曰：「你行走江湖的日子太短了。呢個政府其實背後有好多計算，你未必明白。古語云『項莊舞劍、意在沛公』。呢個政府的領導層最叻就係咁樣。話你知啦，聽北面的消息講，話說舊年討論政改方案嗰陣，中南海高層一直say no，仲同呢個政府講，無得改，唔准嘈。呢個政府想了一個釜底抽薪的絕招，大搞『起錨』，舌戰泛民。表面上係力撐政改，兼且夾到所有建制派陪佢搞。」
元老笑曰：「呢個政府點會唔知，起錨會令香港社會撕裂兼製造對立呢？佢哋咁樣做百利無一害。如果上面堅持方案唔改，起錨起到社會大撕裂，市民矛頭會指向北京橫蠻無理，同自己無關。但萬一社會搞到超級對立、形勢嚴峻，北京看在眼裡，心急如焚，最後焗住出招讓步的話，咁樣呢個政府就會忽然成為民主鬥士，夾到北京讓步，成功爭取。最後結果，你都知啦，北京讓了一步，哈哈！兵行險著成功。」
我問：「咁照你講，今次預算案又搞到社會分裂，背後有咩玄機？」
元老話：「唔知噃，你估下啦！」
倫敦大學亞非研究學院法律系博士
逢周二刊登