評論美帝政治，有一個位，叫做論點萬能key(即係阿爸係男人式嘅論點)，咪就係「兩個美國」論。意思係，美國已經響意識形態上分成「兩個美國」，一批係白人基督徒兼中產、白人藍領之美國人，嗰啲都係共和黨嘅支持者；另一批係自由派中產，加有色人種同埋基層等美國人，都係民主黨支持者。所以，兩派必然各不相讓云云。
查實兩黨制之下嘅國家，而且又有政黨輪替的話，除非發開口夢，否則必然會出現兩個「社會」。例如英國有保守黨工黨，每逢大選，你都可以話英國裡面有「兩個英國」。
不過，點解美帝之選舉，特別要提到「兩個美國」呢？因為美帝今次唔單只係選總統，又選埋參眾兩院之部分議席，加埋一眾州長，有啲州仲要搞埋全民公決等等，所以選戰係一件好熱鬧嘅事。
如果預測沒有懸念，參議院方面，民主黨應會維持多數，至於眾議院呢，又會係共和黨主導。
坦白講，無論邊個做總統，個局都係同上一屆無分別。因為參眾兩院唔會咁順攤，幫總統通過法案。而且，由於選情好激烈，贏總統之得票率唔會特別高，新一屆政府好難用民意去夾國會支持，所以，國會大條道理玩程序玩議案，將所有事件「政治化」，令政局停擺。
因此，依家美帝發展之瓶頸，唔係總統個人能力之高低，而係意識形態之差別，極之尖銳，尖銳到一個各不相讓，各不妥協之地步。美帝經濟唔好，究竟下一條路點樣走呢？社會傾唔掂，選票幫唔到手，議員又唔願意走以前兩黨共識之舊式政治，於是各走極端。妥協？黐線嘅。羅姆尼副手萊恩，六十後政壇新銳，咪就係呢種政客之典型也。
呢種意識形態南轅北轍，永不妥協之情況，已經係世界現象。法國社會黨奧朗德總統非常頭痕，因為佢上台之初，係威係勢咁話滅赤不如刺激經濟，同德國唱晒對台，最近佢都要同現實低頭，輕輕話想加稅減開支增工時，即刻俾團隊及黨友狂轟左搖右擺，依家兩派意見互片，佢都無計。
希臘又好，西班牙又好，唔係搞到騷亂，又或者國內分離主義復興。講到底，面對經濟不振，點樣至可以走出谷底，個個意見尖銳對立，社會撕裂，議會鬥爭只係現實的呈現而已。
所以香港點可能會離開呢個大氣候呢？有領袖提出唔再搞「大市場小政府」，佢提出嘅「適度有為」，又係唔係香港經濟未來發展之共識呢？如果唔係，呢啲口號，咪又會造成社會進一步之撕裂咯！香港社會，係極端保守，係一個政府派兩蚊都俾人鬧共產主義嘅地方，迷信自由經濟之中產，比相信干預嘅多好多㗎，大哥！